Pic : Kim Infimate
- H.Zate
Ka ruolpa a zalna khuma thi chiei
chiei-a zal chun a mi koa ‘Hmangaina hi chu a lo mak ie maw’a ti a, ‘Khang
lawma suol kha hienghin ka fel ve el thei chu ani si a, sienkhawm, hringnun hi
ka ta ding hin ṭapna el ani hih’tiin a sunzawm a. ‘Ka thi a hnai ta si a, ka
hringna a tawp ding hi chu ka hrietthiem. Sienkhawm, ka thi leia ṭap dingnu lei
hin thi hi ka rin anih’a ti nawk a. ‘Ni ie maw, thei nisien, kei, a ṭap ding
umnaw lem hi hei thi lem el ding’tiin ka ngaituona chun ka lo dawn a. ‘ka the san a hriet pha lem chu
tap nasa nawk zuol a tih’ tiin thi hnunga tiem dingin a chanchina ziekna chu a
mi pek a. kar thum aliem nawk meu chun a mi leimsan ta a, a thi hnung chun a
chanchin ziekna a mi pek chu ka hei tiem a.
Hi thu hi i tiem pha chun hi
khawvel a hin ka um ta awm si naw a. Nuni khan ka hmangai zie hi lo hre ran
sienla, ka hmangi leia inthla lem ka nih ti hi lo theinghil ngainaw sienla,
sienkhawm, Tap Naw Raw Seh. A kum le ni
chie ka hriet ta nawh. Pawl 10 kan thaw kum ani a. Broken Family-a inthawka
chawrsuok ti takah inruitheithil ka thaw nasa
a, Ka lungril po po hi suolin a hne hi a ni ringawt. Chuonga hringnun ka
hmanglai chun nikhat chuh, hei ti lang a
hma khawmin ka hmu zing zing hlak. ka pawl inangpui nuhmei pakhat hin ka lu a
hung ben rak a, hei hnek ve nghal el ka tum leh ka hnek nawk ta nawh a. chu
taka inthawk chun iengtin tin am anih kan inpawl deu ran el a. a mi chawk
khawtlawk pei em em a, a chang chun ka nghawk letling el hlak. a tawpa
chun nuhmei le pasal inpawl ran chu kan
lo indit ve ta a, kan in ngaizawng chu ani ran el ta a. sienkhawm, ama neka zu
ka hmangaina chu a l re chuong der nawh. zu chau ka dawn naw a, inhnam chi le a
dawn chi leh, rukruk hlang bang lo. Kartin vawikhat bek kan inchuktirtuhaiin an
mi hremnaw chun ka um thiem ta naw am anih ti el dingin hrem ding hin ka um ve
zie a. chuong hunlai chun alo inzak thei em em a, kei hlak chun iengah ka ngai
nawh; inlarna chikhatah ka ngai ve ringawt a. chuonga kan inngaizawng a inthawk
chun lampui tha a mi hril a, ka nuom zawng chu thiltha lamah mi thuoiin ka
lungril suk-thlek khawm a thleng danglam vawng ni in ka hriet. Ama a fel em em
vei leh inhmenaw ve deu chu kan nih.
At Last, But not the Least, an ti
ang deuin a tawpa chun a mi hne em leiin ka hung fel ve ta a, kan pawla khawm
pas ngai reng reng lo kha ama zarin ka pas ve ta a. ka nun po po hi a thar
vawng hi ani ringawt el anih. Ama le chun nun hi a hadamin a awlsam a, tharum nekin ngaidamna
a ngai pawimaw lem a, nuhmei awmnem ni si khan kan class-a insuol hrata hril
inthang kha tlawmna nunin a mi hne a. beidawnga ka um lai beiseina mi
siempekin, lungngaia ka umin a mi hnem hlak. ka ngaizawngnu ani a, ka ruolnu ani a, ka nu khawm a ni
bawk. Ka ta ding chun ka iengkim hi ani ringawt a. kan ruolhai tuola an inthung
hmunkhat khawm an hal laiin kei ruok chuh misuol ami siemtha leiin kan
inchuktirtuhai khawmin an mi hriettheim a kei ni chu class-a khawm thungna
hmunkhatah kan inthung ngat hlak. chuonga hringnun hlim taka kan hmang lai chun
ka suol lei ni ngei ata, ka phing ana a,
damdawiin ka pan chun Phing cancer ka ni thu an mi lo hril el ta a. sienkhawm,
a hriet ka nuom si nawh. daktawrin ami hril dan chun ‘zu ka dawn nasat lei ani
hmel a’. a hril pei danin ka phing ana ka lo ti hlak kha hi cancer intanna lei
hi a lo ni a, kei hlak chun ngaisak loiin zu ka hei dawn nawk hlak kha ani si
a. damdawiin a inthawk ka suok a, dam naw hle langkhawm dam anga inlang a ngai.
Chemo khai an tum a chuh ka nuom nawh. kei a leia ka puhai inseng ding ka nuom
nawh. cheng tamtak seng anta, damna tak tak a um chuong si nawh. kan inah chun
an mi hung kan sp sap a, ka ruolhai le mi dang dang khawmin. Chu ni chun Nuni
khawm chu a hung ve a, a mi ngai thu le ka hng tha pei chuh a lawm thu a hril
vel liem a. ka lungril chun ka thi chiei
chiei ani lem si a! ka ti a. chu ni chu hlim deuin kan hmang a, zantieng inthim
tawmin an in tieng a pan ve ta a. zana chun ka piin mi buoipui malamin chemo
khai dingin a mi nawr a, sienkhawm, ka nuom nawh. daktawrin chemo khaia dam chi
ka ni tak naw zie a hril leiin ka nuom naw anih. thla hni neka tam ka dam an
ring ta naw leiin ka lungril ka siem fel ta a. kei a leia a nat ka nuomnaw
leiin ngaizawng dang nei angin ka the ta a. ka the ni a ka khum kawla a tap fap
fap dam kha en a va hei intak de aw! sienkhawm, ‘ka dit ta naw che mi maksan
rawh’ka ti tlat leiin a mi maksan ta a. tling nawa inhrietna leia hmangai
takhai hnawl hi chu ava hei rinum de aw.
Ka tiem zo chun a ngaizawngnu
nuni hai inah fein ka pek a, a mithhli far fap fap pum chun a tiem a. a tawpa
chun tap pum chun ‘Invetpa’a hung ti suok hlawl a.
30 July 2015
Hmar Rûn
No comments:
Post a Comment