MIN KALSAN NGAI LO

Pic: Berema Chhakchhuak

Ziaktu: H.Zate , Hmar Rûn

Part- 1

Kha zan birthday party kha a ni nena kan intawnna hmasa ber ni lo mahse, a ni nena kan inpawh țanna a ni. Party zawhin ka țhiante zawng an bialpate'n an thlah a, keia rui buai chu a ni khan min buaipuiin a bike in kan in thleng min thlah ta a nih kha. In ka luh dawn chuan ka nambar min dil a, ka pe ve mai a. Min fawp a, duh thawh em em chuan ka lo chhang ve mai a, ka buai zo vek a ni ber e. 

Zing ka tho chu ka ni deuh chhu a, zan lama ka hun hman dan ka ngaihtuah let a, mak ka ti ngei mai. Party ah kalin, tlangval ka star deuh chu ka țhiannuin min hmelhriattir a, ka inchibai a. Tichuan,  Ruih theih lamah kan țuan ta kha a ni a. kan lam suau suau a, mu leh mal reng ka nei lo, Ka hrechhuak mumal thei lo. Ka țhian dangten min kalsan a, min buaipui kha ka hrechhuak leh a, min buaipui lai pawhin ka za cheng a, a bike a ka chuan lai pawhin amah ka ti huam huam reuh a nih chu. Ka rui a, bakah, amah kha ka duh em a ni. A tawpa min fawh dan ka ngaihtuah letin khatiang kha a vawi khatnaa thleng tur a ni lo tih ka hria a, pawi ka tiin ka zak ngei mai. Him leh țha taka min thlah avang erawh chuan ka lawm a, lawmthu hrilh ka duh a, mahse, a no. reng reng ka lo la ve lo. Chutia ka mut hmuna ka inngaihtuah lai chuan ka phone ri ral ral chuan ka ngaihtuahna ata min tiharh zawk a. Ka han en a, ka hre ngai tlat lo. Ka zawt a, a insawi ngial hnuin ka lo ngaihtuah mek, tlangval hmelțha leh ka star em em kha lo ni rengin, ka nui dawn nge ka țap dawn pawh ka hre lo, ka zak bawk si chu ka insik nauh nauh a, ka zuang tho zawk a. Kan inbia a, nuam ka ti ngei mai. Țha min tih thu leh min duh thu ațanga țanin infawh zei min tih thu thlengin a sawi vek a ni ber e. Eng chu ka hria ni maw! Amah a nih vang pawh ni hmiang, a țawngkam leh a thusawi engkim mai chuan min tihlimin ka hlimpui si!

Inhmuh leh a duh thu sawiin inhmuh leh chu kan rawt a. Tlaia inhmu turin thu kan titlu ta nghal a nih kha. Ka hlim veng veng a, Khawvel hi nuam ta riauin ka hria a, a makin a zûnin min zem chiang ngei mai. Ka phone a lo ri ral ral a, Ruatpuia message niin, ka en chuan, 

"Good Morning, Sangpui,

Thufingte 12:4 Hmeichhe khawsak tha chu a pasal tan lallukhum a ni a, Zahpuiawm tak thil ti erawh chu a ruh timawihtu a ni."

tih hi a rawn thawn a. He pa hi ka va han ning tak em, min ngaizawng ve em em a; mahse, ka duh lova, a message pawh ka chhang țha peih lo. Bakah, a romantic lo thei si. Zing zing ațanga Pathian thu inthawn reng reng chu a romantic lo thei em mai a. Amah pawh hi ka ning hluah hluah a ni ber mai. Min hmangaih tih chu ka hria, mahse, ka hmangaih thei tlat lova,  ka mipa duh zawng a ni lo hrim hrim, a hrim hrimin tunlai chhanah ngaihzawng tur chuan lirthei nei lo te chu a!
Tlai lam a ni a, Tetea nena chuan min rawn bia a, ka inpeih tawh thu a lo chhangin, min rawn lam turin ka hrilh a, kan in kawta a awm tawh thua min chhang zet chu ka zak angreng hle mai. Kei lah ka la zo tak tak der si lo. Minit 5 vel min nghah hnu chuan ka hman ve ta a. Kan in ațanga ka chhuak chu hmuhnawm ti hmel fahran hian min lo melh a, "Mawite, i chhelo lutuk!" min lo ti a. A bike ah chuan Uțawk sawt tur ang maiin ka han țhu ang veng vawng a, ka awmin ka nek salh salh bawk a, nuam kan ti dun ngei mai. Inhmuhna tura a sawiah chuan kan pahnih chauhin kan țhu dun a, min duh zia leh zah pawh sawi lova hetia a awm thu sawiin ka chhuahpui duh chu lawmthu min hrilh malh malh a. Zak leh inthlahrun hmel deuh hian, "ka duh che a, nizana ka chet dan kha i pawi ka sawi chuan min ngaidam dawn nia!" a ti sap a. "Kei pawhin" tih chauh chuan ka chhang a, ni e, zan lamah kan lo khati tawh thova, insum a, innghahtir a, chan palh ka hlau a ni. "Ka lawm e!", tih pahin ka khabe ah dawmin min fawp zauh a, ka chhang mai lo,min fawp leh a, duhthawh em emin ka chhang ve ta a.

  Rei lo a kan hriat teh lul nen khua a lo thim lek lek tawh a, haw zai kan rel a, kan haw lam chu Ruatpuia chuan min lo hmu a, a thik turin Tetea chu ka kuah deuh kher a, a mitmeng ațang chuan a thik hmel ngei mai.  Hun rei lote liam taa kan awm dan phei chuan hria se a na leh zualin ka ring! Chu ni ațang chuan Tetea nena kan hmangaihna kawng chu kan zawh chho țan ta a. In ka thlenga min thlah haw chu ka hlim ngei mai.

24 April 2017 | Thingdawl

Part - 2

Zanah kan inbia a, leng tura ka sawmna erawh tihtur a neih vangin a rawn kal lova, WhatsApp lamah erawh inbiain Video Call in hnai teah kan inhmu reng thova. Kan inbiak zawh a, common room lama ka phei chu Ruatpuia chu a lo țhu a, ka chhungte nen T.V enin an lo titi a. Ka va lang hlawl chu min lo en reng a, an bulah chuan țhu vein kan titi luam a; mahse, Tetea nen WhatsApp lamah kan inkawm avangin ka be tam lo khawp mai. Dar 8 vel thleng a awm a, a haw ve thei ta hram a. Ka nin hman zia chu a, a haw ta chu ka thawl huaiin ka hria. 

Ruatpuia te nen hian ințhenawm hnai tak niin chhungkaw inpawh ve tak kan ni. Ruatpuia hian ka tleirawl chhuah hlim ațangin min ngaizawngin min hel tawh a. Ka duh lo lutuk pawh ni lovin kan mizia a inang lo em mai a, ka duh lo a ni ber mai. Khawtlang leh Sakhuaa inhmang, mi nun ngil, ruihhlo a fihlim leh mite țanpui peih mi tak a ni a. Kei erawh ka dang daih. A chang chuan ka tana a inpe zo lutuk hi ka khawngaih ve țhin a, ka chhungte pawhin amah vang hian min hau fo. "Hetiang khawpa hmangaihtu che hi i hmu lovang." tiin a hmangaihna chu chhang mai turin min hrilh fova, mahse, hmeichhe mawl hian hmangaihtu tak aiin a nawmsakna leh a hnua a nat lehna tur a thlang fo chu a nih hi!
Ni khua alo rei a, Tetea nena kan inngaihzawnna pawh thla 2 lai a lo ni ve ta. Weekend ah Park leh hmun nuam tak takah lengin kan intihlim țhin a. Min duat thiamin a nuam thei hle.  Min ngaihsak thiam lutuk chu a lakah pawh ka pangchangin ka ngai em em a, ka duh chu min tihsak a, kei pawhin a duh chu ka tihsak mai țhin. Kan inpawhin ka inah pawh a rawn leng fo tawh a, a rawn len tak fo ah chuan Ruatpuia pawh a inthlahrung ve deuh tawh a ni ang e, a rawn len khat phah khawp mai. Mahse, unau hmeichhia hlir tih takah kan mamawhna engkimah kan pawt leng dawr dawr a, keiin ka hnar avanga thangtlawm a min puih duh loh ahnekin a hma aiin kan tan a inpe zual emaw tih mai tur hi a ni. Tetea nena kan infawp lai min hmuh țum a a hmela na hmel lo lang zet kha chu ka khawngaih ve thlawt!

Zan a ni a, zan dang ang bawkin kan inbe leh a, Video Call in kan inbe leh a. Kan inthlahlel dun bawk a, kan hlimin nuam ka ti ngei mai. Ka taksa a en duh thu a sawi a, a taksa min en tir phawt turin ka ti a. Ka ngen angin ka hmuh tur chuan a inphelh ta a, awi karei, mipa puitling taksa ruaka ka vawi khat hmuhna  ni a, Ka za vek theiin ka hria. Kei pawh ka kawng chin chunglam chu ruakin ka awm a, hmuhnawm a ti ngei mai. "I nalh lutuk!", a ti a, ka lawm a, ka nui ver ver a, a it tur tingin ka hnute ka hmehsak vel a. Ruak veka awm ve turin min ti a, ka awm ve ta a. Nuam kan ti dun ngei mai. Ni rei ve viau tawhin ka hnute chu khawih țhin mahse, ka taksa a lawngin a la hmu miah lova, kha zan kha a hmuh vawi khatna a ni. Nuam ka tih viau lai khan ka tana țha lo a ni tih reng ka hre lawk si lo!

Chu zan ațang chuan remchang apiangah kan ti ta mai a, a tak kan thleng chuang lo tia kan lo tih chuan a tak thlen chakna min neih tir a. A tak thlen hreh lohna kan nei telh telh a. Kan lut thuk telh telh a ni ber e.
Inrinni a ni a, chhuahpuiah min sawm a, ka inbual fai ser sawr a, kan chhuak dun ta a. Tunah zawng, bike ni lovin, a Car in kan leng ta. Park vela leng leh mai tura inngai kha a ni ta hauh lo, hmun fâl takah hian min hruai a. Kan thlen chuan Car ațanga chhuakin Car nghenga dingin kan titi a, kan tih țhin dan angin Beer leh a senchi kan in a, kan kai chhalh hnu chuan kan duh tawk a, titi a, duhthusam te sawi pah chuan kan inkuah a, mipa leh hmeichhia awm dun ta na na na chu, kan inkeih ta mial mial mai a. Kan boruak a sosang dun kher mai.

25 April 2017 | Thingdawl

Part - 3

Kan duhthawh telh telh a, chin lem kan nei tawh lo a ni ber e. Car chhungah lutin min phelh ruak a, "I nalh lutuk!" min ti sap a. Angelte fan ngai loh ram chu a Car chhungah chuan kan fang dun ta a. Kan zawh chuan, "tunah chuan ka ta i ni ta!" a ti a,  lawmthu min hrilh luam a, "Ka thianghlimna

 i thliak  a , i ta ka ni. Min phatsan suh aw?" ka ti a, "ka sama chul pahin, "ka phatsan ngai lovang che."  a ti a, min fawp leh zauh a. Tichuan, kan in lam panin kan haw ta a.
Chumi ni ațang phei chuan Tetea chu ka ngai zualin ka mamawh ta em em mai a. Ka nuna ka engkim a ni ta ber mai. Ka ngai ngawih ngawih zel a, ka thlahlel em em ringawt zel mai a ni. Ka inbiak loh hlek paw'n ka awm thei lova, min biak loh paw'n ka va be hram țhin.
Vawi khatin Vawi hnih a hring a, vawi hnihin vawi thum a hring zel a, kan inhmuh leh remchang apiangah nupa ni si lovin nupa nun chu kan hmang țhin a. A zeiin min ngaihsak thiam bawk a, nuam ka ti thei hle. Hetiang vel vang pawh hi a ni mai thei ka thlahlelin ka ngai em em ringawt mai a ni. Tetea hi chuan ka rilru a luah a, a tan ka inhlan fai vek mai a ni.
Ruatpuia pawh min ngaihven leh min biak a la bansan chuang lo. Min ngaihvenin ka awm dan turte min hrilh țhin a. Tetea nena kan awm dan te chu a lo hre thawi ve deuh a, a țhat loh thu min hrilh a. Kei lah chuan, "i thik vang a nih kha. Ka hmangaih a, min hmangaih", tiin ka chhang țhin. Ka nuna inrawlh lo tur leh min tibuai lo turin ka hrilh a. A chang chuan a ngawi ve deuh țhin a, mahse, min kalsan thei lo.

Zan khat chu a tih dan ngai bawkin mi rawn be leh a. Chutah zet zawng ka ning ve deuh, ka fuh lo ve deuh nen min thlah zalen tur leh ka nun hi nuam taka hman min phalsak a, min tibuai tawh lo tura hrilhin, a na thei ang ber chuan ka țawng khum a. Min rawn call a, ka an khum chiam a, a aw ațang chuan a rilru a na hle tih ka hre thei a. "Ka kalsan lovang che, mahse, ka tibuai lovang che. Min mamawh hunah chuan a chhe ber pawh tawk la, min rawn hre țhin dawn nia, i tan ka awm reng ang." a ti a. "Mahse, min mamawh tura khawpa vanduai lo hram turin duhsakna ka hlan a che." a ti leh a, call chu a dah ta a.
Ni tin inhmu thei lo mahila a tam thei ang ber inhmuh kan tum fan țhin a. Ka ngaiin ka thlahlel tak zet a, a kianga hun rei lote awm nan chuan ka chhungte buma chhuah mai pawh ka pawi ti lova ka chhuak lawp lawp fo a. Zan rei tak takah pawh nise hmun hla tak takah te a Car a kalin ruihhlo nen kan chawh pawlh fo țhin. A Carah ringawt pawh hian vawi engzat nge zu leh beer kan ina, vawi engzat nge sex kan hman pawh ka hre tawh lo. Engkimah kan inkawp chawt hi a ni ber mai a. Kan ni tin nun ațanga Social Networking Site thlengin kan pahnih zelin nun kan hmang a. Kan PP ah pawh kan pahnih a thlalak hmangin țhenkhat chuan inhmeh min ti a, țhenkhat lahin min thik a. Kan inneih mai ring leh innei tura min duhsaktu pawh an awm fo țhin. Khang kan hun hmante kha he hmeichhe dawn tawi tan hian hlimna leh lawmna piahah hriat rwng tur ava ni teh lul em!

Ka hre reng tawh a, ka hre fo tawh ang. Ka nuna hun hlimawm leh nuam ber a ni a. Tetea bula ka awm hi chuan Khawvelah hian mamawh dang reng reng neiin ka inhre lova, nei thei tur pawhin ka inring lo.
Tetea nen chuan kan phak tawka nun nuam hmangin kan hlim em em a. Mahse, kan hlimna te chu nakina ka natna min thlentu tur a ni tih reng ka hre si lo. A tan chuan ka inpumpek a, ka engkim hi ka hlan a ni ber mai.  Engtik hunah pawh ka mamawh leh ka koh chuan ka tan a awm reng a, ka tan a inpe zo em em a. Zan rei tak takah pawh nise ka koh tawh chuan a rawn kal mai țhin. Chutia inhmu ngun ta na na na chu kan inhmuhna leh kan awm falna apiang chu nawmchenna hmunah kan siam zel a. Kan in, ka room, kan bual in, hotel, park leh hmun nuam tak tak thlengin kan hmang kim khawp mai. Mak tak maiin a ni hian ka rilru leh engkim mai hi a hneh a, a awm dan engkim mai chu ka tan a mawi a. Sex hman tawh loh tum țhin mahila, min sawm chuan ka hnar thei lo leh țhin. Chutia hmang nasa ta na na na chu inven sen a lo ni bik lo a ni ang e. kum khat dawn kan inngaihzawn hnu chuan ka pum chhungah Tetea fa chu a lo insiam țan der tawh chu a lo ni a. A fa meuh ka pai chuan kan inneih a hnai a nih hi ka ti a, ka lawm em em a. A rukin ka hlim veng veng a. Kan fa lo pian hun turte nen ngaihtuahin ka hlim hle. 

26 April 2017 | Thingdawl

Part - 4

Inhmuh ka rawt a, zanah kan inhmu a, inthlahlel em emin kan inkuah a, min fawp ngawih ngawih a. A mak a ni, Tetea lakah hi chuan ka insum thei thlawt lo. Sex kan hmang leh a, chutia sex kan hman zawh a, ruak a kan la awm a, ka chunga a bawh lai reng chuan, "Min hmangaih tak zet em?" Ka ti a, "Hmangaih tak zet e!" tiin min chhang a. Thil eng pawh thleng se ka tan a awm zel ang em? Min nei duh ang em ka zawt a, "aw" tia min chhangin, "Chutiang te chu i hriat vek kha" tih leh a duhtawk tawh emaw ka tih chu a lo la duhtawk lo nge ni nawn a rual a, ka țawng

hlei thei lo, ka sawi tum pawh ka sawi thei lo. A zawh hnu chuan, "Ka rai tlatin ka hria, thla 3 vel ka vi tawh lo." ka ti a. "Enga?!", "I fa ka paiin ka hria, ka vi tawh lo," ka ti leh a, tih dan a ngaihtuah tur thuin min chhang a, hlim tak chuan kan inthlah leh a.

A tuk zing a ni a, A test na min rawn pe a, min ngaisak vangin ka lawm kher mai. Keimahin ka test a, ka rin ang ngeiin a dik thlap mai. Lawm takin Tetea ka hrilh a, ka fa, ka chhung awm mek chu ka ngaihtuah veng veng a. A hnu ni thum velah chuan Doctor kan rawn a, doctor chuan "Ka lawmpui a che u, Nupa vannei tak in ni, a nu pawh a țha a, naute pawh a țha. Thla 4 a ni tawh a, a țha khawp mai. Mahse, insum u la," a ti a, a  khi sak a. Nupa emaw min ti a ni tih kan hriat chuan kan inmelh leh hrek hrek țhin a. Chutia a fa thla 4 mi ka chhungah a awm tih a hriat chuan a ngawi ta hmak mai a. Mak ka ti kher mai.

Zan a lo ni a, min ru mai tur leh innei mai turin ka ngen a, a theih loh thu leh titla mai turin min ti a. 

"Min hmangaih em?"

"Hmangaih e"

"A nih chuan engati nge min neih duh lova?"

"Ka nu leh paten nupui neih an la phal lo. Chuvang chuan titla zawk mai ang."

"Ka duh lo, innei mai ang. Ka mualpho dan tur te pawh i ngaihtuah ve lo em ni?"

Innei tur chuan ka ngen țang țang a. Mahse, a nu leh paten an phal loh thu leh an thu a zawm tur thuin min chhang a. "Kei nena sex hmang tur hian i nu leh pa phalna i la em ni? Engah nge mipaho hi hmeichhe mutpui tura thutlukna siam in awlsam tehreng nen in thawhrah seng tura thutlukna siam tura nu leh pa rawn a ngaih/țul leh tlat țhin le? I lo va nêp ve mawle!" Ka ti a. Nep tih tak chu a la na kher mai. Ni e, a nep reng a ni. "I pai tlang dawn a nih chuan min puh suh ang che, a pa ka ni lova, a fa ka ni hek lo!" ava han na tak em! Ka beiseina leh ka innghahna neih chhunin heti anga min chhang ta mai hi mak ka ti.

A fa ka chhunga awm vangin min phatsan a, min thlahtlam a, min kalsan ta a nih chu. A va han mak tehlul em. Zan a ni a, min rawn bia a, inhrechhuakin ka beiseina te a rawn tihlawhtling dawn emaw tiin hlim takin, beiseina nen ka lo chhang a. Mahse, a ni lo, kan inbiak țan tirha video call a saruaka ka awm lai a lo screenshot  leh Cara sex kan hmang lai, a lak lai pawh ka hriat loh chu a video min rawn thawn a, a fa a ni tih ka sawi chhuah chuan a tihdarh tur thuin min vau ta a nih chu! A makin a va na kher em! Khati ang khawpa min thlahlela min duh țhin khan amah avanga ka nihna, 'naupai' ngei chu min phatsan nan a hmang ta a nih chu.

Min țhen a, min hnawl a, min ban a, min kalsan mai bakah ngaihzawng dang min neihsan a nih chu! A va na kher em. Ka fa pai mek chu a lang lek lek tawh mai si. Engtia tih tur nge pawh ka hre lo. Ka inngaihtuah nasain ka rilru a buai țhin kher mai. Zan a ni a, ruah a sur bur bur a, țek a tla reng a, Electrict Current a awm lo bawk a, ka roomah țhuin engkim ka ngaihtuah a, ka ngaihtuah hnu chuan ka hma lam a thil lo thleng tur chu ka hmachhawn ngam lo.

 " A pain a hnawl hi a lo la lian anga a pa min zawt se engtin nge ka chhan tak ang? Chu chu a la hla, ka rai tih an hriat hunah min zawt se engtin nge ka chhungte ka chhan anga, engtin nge ka țhiante ka chhan tak ang? Mi tam zawk lah chuan hmeichhia hi amahin a rai thei lo tih hre lek lovin a tuartu zawk hi hur leh awm țha duh lo angin min puh emaw a ni awm si a. Hur viau pawh ni ila mipa tel lo chuan Hmeichhia hi a rai thei lo a ni tih leh mipa tihsual a tel ve a ni tih lam ngaihtuah lovin a tuartu zawk chu sawichhiat rawn ka ni dawn si a. A pa ngeiin a paa puh a nih chuan Sex Video leh saruak thlalak hmanga tihmualpho a tum hian eng thil nge ka tihsual a, eng pawi nge ka sawi tak! I duh a, i tum danin i awm a, kei pawh, ka duhthlanna ngeiin nangmah vangin ka nunna ka chhat ang e. I duh leh ka ruang hlawm  turin thlanmualah i rawn kal dawn nia!" 

tih chu ka thawn a, ka phone chu ka off nghal hmak a, ka pindanah dahin thlanmual lam chu ka pan ta a. Nun hlimna emaw tia ka lo belh țhin ten natna min thlen a, ka tan a țha emaw tia ka lo tih țhin ruihhlo leh sex ten nun beidawnna min pe a, ka hmangaih hlimna tur tia ka lo hlan Saruak a ka lo inlan leh Sex te chu min vawletttu leh  ka chhiatna hmanrua mai a lo ni a. Krista chanchin min hrilh lai khan engah mah ka lo ngai ngai lo kha ka inchhir a, ka țap hawm hawm a. Thlanmual chu ka thleng a, thlanmual a bung zarah chuan hrui suihin ka valh a, ka inngaihtuah vang vang a. "LALPA, i hnen ka rawn pan dawn. LALPA, kei misual hi min kalsan ta em ni?!" tiin ka phun sep a, hrui chu ka nghawng ah vetin ka dinna ka phet a, ka tla hnawk a.

"Ti suh!" tih pahin min chawitu a awm a,.min chawi a, hrui chu a chhat a. Ka thaw tawp țep tawh chu ka thaw hlawp hlawp a. "LALPA, chuan a kalsan lo che, a kalsan ngai lo che a. I tan a awm reng!" a ti a.

Ka han en chiang chu Ruatpuia lek chu lo niin, leiah min nghatin min pawm a. Ka sam a chul mawlh a, min kuah a. "I LALPA chuan a kalsan lo che a, kei pawhin ka kalsan hek lo che." a ti a. "Engah nge heti ang te tih i tum mai mai ni? Hmangaihtu i nei tih hre ta che. I nu leh pate tan fanu thi neih ai chuan fanu rai neih chu a la țha zawk fe dawn tih hre ta che!"a ti a. Min kuah a, "i hre lo a nih kha!"  tia chhangin min rawn hmuh dan ka zawt a, Tetea mesage tur chu Ruatpuia hi ka lo thawn lek chu niin a mak khep mai, min kuahin ka chalah a fawp mawlh mawlh , min țhuttir ta a.

Thil tam tak sawiin ka awm dan zawng zawng ka hrilh vek a. Nau ka pai mek chungchang ka hrilh chuan, ka hmaah țhingțhiin, "i duh chuan i nei ang. I phal a nih chuan, ka fa angin kan thantir ang." a ti mawlh mawlh a. In lama haw turin min ti a, min hruai haw ta a.

In kan thlen chuan ka chhungte chuan min lo ngaihtuah hle a. Ka țawng hmain a Ruatpuia chu a țawng zung zunga, amah nena inhmu angin a sawi a. Mak ka ti kher mai. Heti ang em em hian ka tan a inpek duh hi ka ring ngai lo.

27 April 2017 | Thingdawl

Part - 5

Ka chhungte chuan Ruatpuia nen khera kan inhmu chu mak an tiin an awih lo kher mai. Mahse, an hriat dan leh hmuh danah a ni miau mai si a. 

Zan ka mu chu ka rilruah zawhna tam tak a lut a, Zawhna mai bakah mak tihna pawh a tel. Tetea thawn tuma Ruatpuia ber kher ka thawn kha a mak a. Chu aia la mak chu ka tihnat ngun tehreng nen, ka tana a inpe reng mai hi a mak a ni.

Ruatpuia chu ngam leh ngam lovin ka text a, kan inbia a, engkim, kan awm dan zawng zawng nen ka hrilh vek a. A hriat hnu vek a nih thuin min lo chhang a. Ka fa, ka chhunga awm mek chu  nei ngei turin min fuih a, "Tu nge a pa a ka chhal ang?" tia ka zawhna chu, "I phal chuan," tia țanin, "i tan ka awm reng a lawm." a ti leh a. "I phal chuan a pa chu ka lo ni ang e!" a ti a. Ka va lawm kher em. Mahse, ka ring thei lo, ka pawm mai thei hek lo. "I mawl em mai, i chhungte tinatu nih ka duh lo!" tiin ka chhang a. Mahse, a pawm duh bik lo. Baihvai taka ka awm lai a hmuh theih loh thua min chhangin ka tana a awm reng tur thu min hrilh a. A makin ava hlu si em! Min hmangaihna hi ka tan a hlu a, a hlutna hi hrilhfiah thiam rual ni lo mahse, amah lam ka ngaihtuah erawh chuan pawm mai har ka va ti si em! A tuka inhmu a, hmaichhana sawi dun turin kan ti , Muthilh zai kan rel ta a.

A tuk khua a lo var a, Ruatpuia nen chuan kan inhmu a. Ka lo tina hnem tawh si a, ka pan ta mai chu Ka lai deuh țutin ka hria. Min lo nghak run a, ka va thlen chuan min lo pan vat a. Hlim nui hmel pu sang chung hian, "i țha maw?!" a lo ti a. Ka țhat thua chhangin a bulah ka țhu ve a. Thil tam tak sawiin kan titi a, min hmangaih thu leh min nghah reng thu sawiin, ka pawm theih phawt chuan min pawm theih reng thu a sawi a. Duh thlang thei ka ni lova, min sawmna chu ka pawm ta a. Ka puma Tetea fa pai reng chung chuan, hmangaihna dik taka min hmangaihtu hmui chu lawm avanga bianga mittui luang ngaih chungin duhthawh takin ka fawp a. A ni chuan min chhang mai lo, mahse, ka fawp lui thova, a hnu chuan min chhang ve mai a. Kan in thleng kein min thlah a, inthlah rau rau-ah a danglam bik tawh khawp mai.

Zan tin, zing tin Pathian thu min hrilhin min fuih reng a. A ni nen chuan nun a danglam a, Ka nun a hlimin nuam pawh ka ti tawh khawp mai. Mahse, buaina kan nei.  Ka nau pai chu thla 5 a tling tawh a, zep reng theih a ni dawn lo tih kan hria a. Kan inru ta mai a. Veng bawr leh țhiante'n mak an ti ngei mai. Ruatpuia nu phei chuan a ring lo hulhual. Mahse, kan laklawh tawh si a, pawm loh theih a ni tawh si lova, kan inkawl ve ta a. Kan hlimin nuam ka ti țhin khawp mai a. Chhungkaw zahawm taka lut ka ni bawk a  dangdai khawp mai. 

Mahse, buaina a awm tlat mai. Chutia hlim taka kan awm lai chuan Tetea chuan min rawn tibuai reng mai a. A tawpah phei chuan ka saruak thlalak chu a lo thehdarh a, ka zakin hrehawm ka ti ngei mai. Keimah ai mahin Ruatpuia chu ka khawngaih a, mahse, a tuar thiamin min hnemtu zawkah a țang a. Pathian hnaih zawk tura min fuihin ka dikna tihlan nan ka police thleng kan thleng a. Tetea pawh Jail te a han tang ang ren rawn a. Mahse, sum an lo nei deuh a, a chhuak leh vat a. A pawi  ngawt mai.

Tlai khat, fa ka neih dawn hnai ka chhuak chu Tetea Car ka hmu a, ka kal pel hnu rei loteah chuan Tetea leh a bialnu ka hmu leh . Keimah tawk zawng a an rawn kal chu  A bialnu chuan min tihel tih hriat tak hian a kuah vel a, mahse, engah mah ka ngai vak lo.  Tetea chuan min deuh hmel deuh hian min melh pahin, a bialnu hnenah chuan, "A Easy lutuk!" min ti a. Ka zakin ka thinrim lutuk chu Ka inhup a, ka kalsan ta daih a. Hmeichhia lah hi kan mawl a ni e, a hmeichhepui chunga nunrawng tawh chu a chungah pawh a la nunrawng ve thei tih reng ngaihtuah lovin Mipa chu kan kawp leh a. Mipa hian mualpho a hnekin luck chan an chang leh țhin.

Ruatpuia chuan ka natnaah min hnem a, ka tan hian a inpe zo em em a. Min ngaihsakin min duat thiam a, A fel khawp mai. Amah vangin ka nun chu a inthlak thawk a, nun thar neiin, Min kalsan nia ka lo hriat țhin LALPA hian min kalsan ngai lo tih min hriatnawn tir fova, Ka Lalah ka pawm ve thei ta a.

Hun leh ni a liam a, dam takin nau pawh ka hring a. Ka nu leh pa, ka chhungte bakah Ruatpuia chhungte pawh an lawm ngei mai. A hming phuah mawlh mai chu an inchuh a, kan hlim dar dar khawp mai. A puin  a chuh tlat avang leh Hmeichhia a nih bawk a vangin a pu,(ka pa) chuan a hming phuahin, a hmingah, Ruatpuia a nei hi a nu tan nun thar neihna leh kan tan pawh nun thar kan hmuhna a ni a, a ti a, Lalnunthari a vuah/sa a, Kut ka bengin kan lawm dar dar a. Kan chhungte ve ve pawh an hlim khawp mai.

Ka fanu a pian ațanga kar khat hnu chuan a dam lo hlauh mai a. A natna hriat si loh chuan min boral san ta mai a. Mi dang tan chuan Hlamzui mai ni mahse, a pawmtu, a hringtu tan chuan a va na si em! Mahse,  a boral ta kha tun hnu hian pawi ka ti lo telh telh ta mai. Lo dam chu nise, amah vangin Tetea ka hriatchhuah phah ang a, a len hnuah a rawn pan emaw a ni ang a. Tun hnua ka ngaihtuah hian kan tana țha turin Pathian hian kan chungah ro a rel niin ka hre ta.

Kohhranin min phuarna an phelh hnu chuan Ruatpuia nen chuan kan inkutsuih/innei țha a. Chuti chuan, Ka chan chhiat lai ber pawha min kalsan ngai lotu Krista leh Ruatpuia chu belin, min kalsan tura ka ngen pawha min chelha min zui reng țhintu nen chuan chhungkaw țha tak dinin, kristian chhungkua duhawm tak kan din chho ta a.

Ani, Ka phu loh hiala min hmangaihtu hian Min kalsan ngai lo, min thlamuanin min awmpui fo țhin.

 A TAWP TA!

27 April 2017 | Thingdawl