SIRA MI LO HNÂWL MAW!

Pic: Lalruotkim Fimate

-H.Zate, Hmar Rûn

Hmangaina hi thenkhat ta dingin hlimna le lawmna a ni el khelah nihlawna a ni a, beidawngna ruoma inthawka beiseina tlang sipa thuoi kaitu a ni hlak.

Sienkhawm, thenkhat ta ding ruok chun tapna intluntu el niin 'A Pawi Ngei Maw' tiin  'Ka tappui nawk hlak si' an ti pha hlak a, ngai pum zing khawma 'nang ngailai puon ang bang de ning' tia inkiu vawng vawngna a ni hlak . Chuong ang bawk chun Pu Paul siemlien-in mawi em ema a sak 'Sirah mi lo hnawl maw' khawm hi hmangaina tappuitu-in a phuok ti naw ruol a ni nawh.

A hming tak khawma ko ngam lovin 'Aw Lung suklawmtu' tiin a ko a, 'sakhmel mawite' a ti zawm zata, a la dittawk nawh, 'Enchimlo' a la ti sa kher bawk.

Aw Lung suklawmtu Sakhmel mawite,
Enchimlo, Lenruol tawna ka'n hnempui,
I Sakhmel innui sieuva ka tawng changin,
Kei di'n khawvel hlimna'n a'n chang hlak

a hei ti a, a ta ding chun hmeltha, ennat pangpal inlau leia a en ngam naw, a lungril suklawmtu le ruol laka khawm a uongpui le inhnemna tak a ni hlak zie hrilin. A hmel innui sieuva a hmu changa a ta dinga khawvel hi hlimna a'n chang el hlak thu mawi em emin a hung inzawt a. A ni ngawt el hmangai takhai hlim hmel hi chu a lo mawi em a nih. ' Thei nisien i thil chawi a khan inchang lang, i kutin a mi tawk awm si a' tia thlakhla ngawi ngawi-hai kha an ni mieu a.

A la dittawk nawh, an umna a lo inang bawk si nawh. Sienkhawm, 'lengna zalamtluong sei hin nang ngai a bang chuong si nawh' an lo ti angin, 'Aw lung suklawmtu sakhmel mawite' ti bawka ko nawkin umna inangnaw sienkhawm, lungrilah an hlimlai ni, hlim taka an insailai-hai a ngaituo changa a ngai bang theinaw thu le a ma a ngaina chu puon tiengbana ei bang hlak anga hei bang el thei a ninaw thu chu mawi em emin hienghin a hung inzawt nawk a.

Aw Lung suklawmtu Sakhmelmawite,
Lengna kar lamtluong lo indang sienkhawm,
Lungrukah ei hlimlai ni ka dâwn changin,
Di nang ngai lai puon ang ka bang thei nawh. '

Tiin chang 2na a chun a hung inzawt a. Hi po khawm hin a phuoktu thu thiem zie le a phuoksan tam tak chu a fie uor el. Umna a hlat lei ringawtin inngaina re bawk si nawh, 'Khuo hmuna leng hmanin tawngni an nghakhla a' tia inthlakhla hi chu a lo awm hrim a nih.
A thunawn ei hei en a. Ngaingam taka a umlaiin a hmangai em em nu le pahai chun hmelma ang elin an kar an dang a. Inhmu tak ngiel khawm an phal ta nawh. Chuonga an umlai chun inhmu thei bawk lo, a nu le pa haiin khel tam tak infain an lo thlem hlak chu ni ngei ding a ni a. A tawpa chun a ngaizawng ngei khawm chun a hung the ve ta a. Lungril na le lungrila tap rawng rawng pumin,

'NGaingamte'n maw lenglaiin,
Doralpui ieng maw i Chun le Zuo-hai'n
Kar an mi dan, Sakhmel dar ang intawng ding,
Ka tleitir, sirah mi lo hnawl maw?! '

tiin a hung inzawt suok a. Hi hunlai taka hin chu a lungrilin ar inhmang zawng a ta, tuorpuitu le hnemtu ding zawng rawng rawng ngei a tih. ' siktui ka ni lai khan riel ang lo luongral lang' ti ve vawng vawng ngei a tih.

Chuonga a hmangai tak, a ta dinga ringum zing dinga a beisei meu khawma a hung the ta meu chun Val hi a um tawk rawk bik ta nawh 'Hmangainaa kawp rem thei hlawl lo ka lo hmangai che a ni hih. I nu le pa duthusam ngei chu kumtluonga a nuhmei ni dingin nei la' a hei ti phawt a, 'nang ngai lai puon ang ka bang thei nawh' titu khan 'Di nang ngai lai puon ang bang de ning' tiin a lo inhlan ve el ta a.

'Tuorem lo lungdi ka lo tawng che,
I Chun le Zuo-hai du-aisam ngei chu,
Pawm ta la, kumtluong nuthai chang dingin,
Di nang ngailai puon ang bang de ning'

hmangai tak nu le pahai rem naw leia hei the tawp el chu a rinum awm ngei. A ma tan ngamnawtu kha chu pawm ran hlak a tum bik si nawh 'ngai ta naw che lo tum ka tih' tiin a mangtha ve ta a.

20 August 2015