TLEIRAWL HMANGAINA

Model: Mimi Tlau

Ziektu: H.Zate , Hmar Run,

"Imi hmangai am?!"
"Aw, ka hmangai che!"

"Ieng anga  nasa in?!"
"Ka nun nek khawmin!"

"Imi hmangai chun mi'n ru el rawh!"

"Nang le kei siețhain, i nu le pa chan ngaituo  phawt la!"

A ni annawm. Kum 7 sung an lo um tak na, ni tin zan tin an inhmuna hlak chu suoksanin Khawvel hmasawn dingin an suok ta ding a ni si a. A nei nung deu chun khawpui an pan an ta, a nei naw deu ruok chu mani khuoah inchuk zawm thei lovin an umm ding a ni si!

JNV-ah pawl 6 inthawk pawl 12 chen a thlawnin an kai a. A thlawn bawkin hmun hla tak tak an lo hmu tah a. Mani le sunghai thawsuok ngei a khawvel an hmasawn a ngai ta a. Ruolhai po leh  inhmu nawk hun ding suongtuo thei lo khawp a inhlatin an ințhe ding a ni ta si. Chu po nek chun, tleirawl hmangaina an lo inhlan tak, lungril thienghlim taka hmangaina par zu an lo dawnpui, țheni ding ngaituo ngai lo chu an ta dingin țhena ni kawl a hung var ding chu an thlir ngam thlawt naw a nih.

An exam nuhnung tak a ni tah a. Pawl 12 exam an zo chun sikul an suoksan a ngai. An zova, an zo le inrual a an sikul suoksan nghal vawng ding an nih. An Ziekfung an lek a, an Zakuo le kekawrah hai inhrietzingna dingin hming an inziekpek a. Innui dar dar pumin, a ruka an ta dinga țhen na ni a nih ti hre siin, an lung an leng an khuo a sawt lawk hle. An sanghai hlakin an hung chibai sap sap a, a țhen an lo duot deu hai hlakin țap pumin an inthla ve bawk! An thuomhnaw khaipekin an gate chen an inthla tawl a. Țhenkhat an nu le pahaiin hung indawnin, an boruok a rik ngei el. An ruol danghai chu sikul suoksan dingin gate-ah an um țhap tah.

Anni ruok chu, ruol danghai hmu phak naw ah thu an la hril niep niep a. Bieng a mitthli luong par pumin, "*I țhang lova nun hmang ka'n zuom nawh*!", tiin an inhlan a. Ni tin zan tin a inhmu hlak, chu sa khawm a innngaia inthlahlel em em hlak kha inhmu nawk hun ding khawm hriet thei lova  an ințhe ding chu an ngam ngang naw a nih.
" *I nu le pa hlim hmel khu en ta. Nangma lei chauva hlim an ni annawm*!" tiin Pasal lem chun pachang takin a hei hril ngiel a. Sienkhawm, a hmura lo hup malamin, "*Hril ta naw rawh! Imi hmangai tak tak naw ning a tih!*" tia insek rawl taka tap par puma a hril meu chun pasal khawm  a pa thei nawh. A awmah a kuo fe thlawp a, "*Ka hmangai che. Ka hmangai che annawm! Sienkhaw, hi tleirawl hmangaina hi tuhin ei puitlin thei naw a nih! Ei inbiek zing ding annawm. Ka hmangaina che nekin i nu le pa hmangaina che hi ka'n za lem!*"

Thu an hril mumal thei nawh, chu tleirawl inhmangaihai chun thienghlim taka an inhmangaina an lo vawng hlak chu an hang ințhe ding meu chun a vawikhatna dingin ditthaw em emin an infawp ta a.

Hmangai tawnga hmangaina nei ve chun an dem bik awm nawh ie!

An ruolhai umna tieng chu an fin ve thei ta hram a. Chu nuhmei chu a nu le pain an hung indawn  a,mipa ruok chun indawntu a nei ve nawh! Ruol, kum 7 sung JNV Campus chinte dunga lo inkhum tah an hei ințhe ding chu an rin el khawm ni lovin kha ni kha tlung thei naw sien an ti hiel a nih. Țap puma an lutna sikul chu țap chung bawkin an suoksan naw  ding si!

Bienga mitthli parawl kieng pumin an inthla sang sang a, an liem a, an liem pei a. An inkuo mawl mawl a, inhmu nawk hun ding dam hrilin inhmu nawk ngei dingin an intiem tawl a. Tleirawl inhmangaihai pahni khawm  an hei ințhe ding tak tak a, Nuhmei motorah a lut a, Pasal motor dangah a lut ve ding chu tleirawli chun a tuor thei ta nawh.  A tlan suok a, a awmah a va'n bei thlawp a. Inzak reng an dawn thei nawh.  Inkuo hlum tum ni awm hrimin an inkuo chiel chiel a. Inngai hle siekhawm, an taksa ruok chu ințhe a țul si.

Inthlahlel takin an invai liem a. Kha ni kha an ruolcham/ruolhai kim taka an inhmu hnuhnung tak a ni ding ti reng an hriet si nawh!

15 January 2017 | Thingdawl

Hmar Țawng inlet: 29 May 2017 | EFCI Mission Center, Guwahati

Download H.ZATE Apps

Hi thuziek hi TLEIRAWL HMANGAIHNA, ti thupui hmanga Lusei Țawnga ka ziek, MZP Chanchinbu a suok ta hnung, inlet dinga ngentu tam em leia ka hung inlet a nih. Țha i ti chun a hnuoia Share Button hmang hin lo share in, hi blog hi i ruolhai lo hril ve la!

Sharing Is Caring!