THINLUNG LALNU

Pic Credit Goes to ZOOM Kolasib & Lalmuankima

Model: Jeneth T Sangi

Ziaktu: H.Zate , Hmar Rûn.

"Kei pawhin ka duh che a lawm!" tia ka lam i lo hawi ni tur tluka  ka tana ni hlimawm a awm áwm love.
Ka tana vul tura thutlukna i siam hi ka ring ngai lova, min hnawl ni la ka ring zawk hial awm e! A chhan chu, eng dang vang ni lovin, ka tan a i hlut em vang zawk hian.

I hmel, i pian, i engkim mai kha ka tan a mawiin hmuhnawm a tling a. I ke dik em em mai, I kut no nak mai, i awm bawr nalh em em mai,  i biang sen tai tek, leh  i hmui fawh cho em em mai te kha ka tana vul ve thei tur hian ka suangtuah chhin ngai lo.  I mawina hian min hipin Hrui lovin min zem â zova, i țhatna hian Hnang lovin  min phuar si. Ka tana i hlutna sawi dawn ila, ka sawi chiam aiin

ka ngawih mai hian a fiah zawk awm e!

I hmel ka hmuh ni ațang khan mi â ni si lo hian, i lakah hian ka â zova, rilru buai ni si lo hian ka rilru hi a buai zo a ni ber! I lam hawia melh reng che ni chuang lovin Nangma lam lo chu hmun dang ka hawi thei tawh lo.
Nangmah vang hian, Zo nula țhat lohna sawitu chu, Zo nula țhatzia hrilh chungin thih ngamin ka bei ngei ang. 

I nun mawi, inngaitlawm leh zahawm em em mai nei tura chawi reng ni si lova chawiliantu che i nu leh pa hi, a thlang theitu leh a hlan theitu zawng ni ila, Nu le Pa țha ber chawimawina dawng tura thlangin ka hlan ngei ang.
I kianga awm a nuam a, nang nena nun hman a nuamin a hlimawm a. A takah i hmel hmu thei lo mahila khawvel mi fingte zara ka ta, ka kuta ka hum veng veng țhin a i thlalak awm ngei mai hi hmuhnawm a tlingin ka thlir ngunin ka va thlir ning lo si em! Nun hlimawm min pein, beiseina nung min siamsak a, Nang nen chuan he lei hrehawm hi vanram tlafual a chang țhin!

Hmel țha si, nun țha bawk si, nelawm; zuamawm si lo, ngainatawm; ngaih nat awm si lo, zahawm; hlauhawm si lo, nui mawi ; nui reng chuang si lo, duhawm; duh duha awmpui theih si lo i nihna hian ka thinlung chhungril hi luta awm tak tak ni chuang si lovin i luah reng a. I nui hmel mawi tak mai te mawlh mai hi nuihpui loh theih loh, țahpui huam huam tham a mawi lah a ni si!

Thlir loh i har angin thlir nin i har a, i mawina hi chuai thei lo nia mawi a ni a. Hringnun tawite hmang tura piang ve tho hi Nung chatuan tur hmel i pu tlat si.  Siamtu faka chawimawi țhin Angelte zinga mi nia mawi i ni a, chám hlen tur awm lo mahila mihring dangte anga awm rei tur hmel i pu lo! He lei hrehawm hi i khualzinna ram a ni tih ka pawm a, 'Eng chen nge i châm dawn?' tia zawh mai che ka nuam.

Lungngaih, nat leh ril țam hre lo awma mawi i ni a; mahse, i hriat avang erawh chuan siamchawp i ni bik lo tih ka hriat phah a. Zun leh ek leh hnap pawh nei ve lo awma mawi hian i lo nei ve zel erawh, keimah anga mihring ngei i nihzia min hriattirin, mihring zinga i mawi fâlzia ka hriah phah si. I pawn lam mawina phena chhunglam mawina mawlh mai hian ka mit ni lovin ka thinlung a hneh a, ka tum reng vang ni hauh lovin 'i bawih' ka lo ni reng si! Bawih a min chhal duh lo erawh ka tan a hlu a, i nui mawi ringawt pawh hlimpuitu tan chuan i țawngkam mawi hi chu a va hlu zual tak em!

Rilru i luah a, nang lo ka ngaihtuah thei lo. I tan engnge ka nih hre si lo hian ka tan hian i va hlu si em. Hmeichhe dawrâwm zawk hi ka chakna hnâr i ni a, chak lo zawk hi min tichaktu niin ka nun kaihruaitu i ni si.
Kil tin kil tang hrutin fang mahila,  "Ka lungdumtu, ka thinlung Lalnu chu, Zo Lanu, nang ngei hi i  lo ni!" Ka ti fan ang!

04 March 2017 | Thingdawl