TLEIRAWL HMANGAIHNA

Ziaktu- H.Zate, Hmar Run,

"Min hmangaih em?!"

"Aw, ka hmangaih che!"

"Eng tianga nasa in?!"
"Ka nun ai pawhin!"

"Min hmangaih chuan min ru mai rawh!"
"Nang leh kei dahthain, i nu leh pa chan ngaihtuah phawt la!"

A ni a sin. Kum 7 chhung an lo awm ho tawhna, ni tin zan tin an inhmuhna thin chu chhuahsanin Khawvel hmachhawn turin an chhuak tawh dawn a ni si a. A nei nung deuh chuan khawpui lam an pan anga, a nei lo deuh erawh chu mahni khuaah zir zawm thei lovin an awm dawn a ni si!

JNV-ah pawl 6 atangin pawl 12 thleng a thlawnin an kal a. A thlawn vekin hmun hla tak tak an lo hmu tawh a. Mahni leh chhungte thawhchhuah ngei a khawvel an hmachhawn a ngai tawh a. Thiante zawng nen inhmuh leh hun tur suangtuah theih loh khawp a inhlatin an inthen dawn a ni si a. chu zawng ai chuan, tleirawl hmangaihna an lo hlan tawh, rilru thianghlim taka hmangaihna par zu an lo dawnpui, thenni tur ngaihtuah ngai lo chu an tan thenna ni kawl a lo eng tur chu an thlir ngam thlawt lo a ni.

An exam hnuhnung ber a ni tawh a. Pawl 12 exam an zawh chuan sikul an chhuahsan a ngai. An zova, an zawh rual an sikul chhuahsan nghal vek tur an ni. An ziakfung an lek a, an kawr leh kekawrah te inhriatrengna atan hming an inziahsak a. Nui dar dar chungin, a ruka an tana thenna ni a ni tih hre siin, an lung a leng lawk hle. An naute ho lahin an rawn chibai sap sap a, a then an lo duat deuh te lahin tap chungin an thlah ve bawk! An thawmhnaw khai sakin an gate thleng an thlah hlawm a. Thenkhat an nu leh paten rawn lamin, an boruak a rit ngei mai. Thian dangte chu sikul chhuahsan turin gate-ah an awm thap tawh.

Anni erawh zawng, thian dangte hmuh phak lo ah thu an la sawi niap niap a. Biang a mittui luang par chungin, "*I tel lova nun hman ka zuam lo*!", tiin an inhlan a. Ni tin zan tin a inhmu thin, chuti chung pawha innngaia inthlahlel em em thin kha inhmuh leh hun tur pawh hriat theih loh a an inthen tur chu an ngam ngang lo a ni.
" *I nu leh pa hlim hmel khu en teh. Nangmah vang chauha hlim an ni a sin*!". tiin a mipa zawk chuan pachang takin a han hrilh ngial a. Mahse, a hmuia lo hup pahin, "*sawi tawh suh! Min hmangaih tak tak lo a ni ang!*" tia pangchang aw taka tap par chunga a sawi meuh chuan mipa pawh a pa thei lo. A awmah a kuah bet thlawp a, "*Ka hmangaih che. Ka hmangaih che a lawm! Mahse, he tleirawl hmangaihna hi tunah kan puitlin thei lo a ni! Kan inbe reng dawn a lawm. Ka hmangaihna che aiin i nu leh pa hmangaihna che hi ka zah zawk!*"

Thu an sawi hlei thei lo, chu tleirawl inhmangaih te chuan thianghlim taka an inhmangaihna an lo vawn thin chu an han inthen dawn meuh chuan a vawikhatna atan duhthawh em em maiin an infawp ta a.

Hmangaih tawnga hmangaihna nei ve chuan an dem bik lo'ng e.

An thiante awmna lam chu an fin ve thei ta hram a. Chu hmeichhia chu a nuin a rawn lam a,mipa erawh lamtu a nei ve lo! Thian, kum 7 chhung JNV Campus zimte chhunga lo inkhung tawh an han inthen tur chu an hreh mai ni lovin kha ni kha thleng thei lo se an ti hial ani. Tap chunga an luhna sikul chu tap chung vekin an chhuahsan leh dawn si!
Bianga mittui parawl kiang chungin an inthlah sang sang a, an liam a, an liam zel a. An inkuah mawlh mawlh a, inhmuh leh hun tur te sawiin inhmu leh ngei turin an intiam hlawm a. Tleirawl inhmangaihte pahnih pawh an han inthen dawn tak tak a, hmeichhia motorah a lut a, mipa motor danga a lut ve tur chu tleirawli chuan a tuar thei ta lo, a tlan chhuak a, a awmah a va bei thlawp mai a. Zah reng an dawn thei lo. Inkuah hlum tum ni awm hrimin an inkuah chial mai ani. Inngai hle mahse, an taksa erawh a inthen a tul si.

Inthlahlel takin an invai liam a. Kha ni kha an thianho kim taka an inhmuh hnuhnung ber a ni dawn tih reng an hre si lo!

15 January 2017 | Thingdawl