HMINGTHANGMAWI

Model : Elisha

Ziaktu - H.Zate, Hmar Rûn.

Chaw ei dawhkanah chuan kan țhu țhap a, ka huphurh ang ngeiin ka pa chu a lo țawng chhuak a, "I nei ngei tur a ni," a ti chang fak a. Thurawn a ni lova, ka ngaihdan a la hek lo, thupek a ni zawk. "Pa, Naupang chhia mai ka la nih hi!" ka ti hrâm a. A thlengah a kut a nghat a, rum em ema min melh chungin, "i thil tih hi naupang thil tih niah i ngai em ni?" Chu zawng chu kan pafa thil inhrilh dan a ni.

Ka ngam lo chung ka nu kaltlangin ka hrilh a, sawn man peka inrel fel mai theih nise ka duh. Mahse, ka pa ngaihdan a ni lo bur. Mi fate tihchhiata neih leh loh chu a tih zawng a ni lo bur hi a ni tawp. Ka lehkha zir tur nen, ka buai khawp mai. Bakah, ka hmangaih lo hrim hrim.

A, a hrim hrimin, ka thiam loh bik pawh a ni lo. Min chhai vel hawr hawr a, a lo rai a ni ve mai a. Ngaihzawng ka nei tih pawh a hre reng a, min lo duh ve a. Ka zu ruiin ka lo mutpui ve a ni mai a, ka thiam loh viauna ka hre bik lo.

A vanduai nge ka vanduai zawk pawh ka hre lo. Nge, a lo tum reng zawk pawh ka hre tawh love! Vawikhat chauh kan chesual a, a lo rai vei put reuh a. A ni lah chu titla mai tura ka hrilh lahin a han duh lo vel a, "tualthah ka duh lo!"  a ti a, "sual kan ti tawh tho a lawm," ka tih pawhin a duh chuang lo. Ka sawi ngun poh leh a duh loh zia a tilang hnem ting mai a. Hmeichhe mak tak zawng a lo ni e. Ka neih loh tur thu tlang taka ka hrilh pawhin, "a pawi lo, miin nangmah i ni tih pawh an hre lovang," a la ti zawk zamah a. 

'Aw, he hmeichhe mak tak hian min timak zo tawh!' ka hua a  ka nibg ngawih ngawih maiin ka hria. Kha zana thil thleng vang kha  keimah leh keimah ka inhua.

Ni leh kar liamin thla  thla a vei a. Ka fa a pai ațangin  thla  7 zet a ni tawh. A pumah pawh a lang tawh khawp mai. Chutia a pai si chuan ka fa chu fahraha siam lah ka duh leh si lo, ka buai a, ka buai chhe zo ta a ni. Hmingi lah chuan sawichhuah a tum der si lo.  A chhungte'n zep mahse a zep thei țang țang khawp mai. Amah chuan a thutiam a tihlawhtlung a, mahse, kei chu a nem zawkah țangin ka farnu ka hrilh ta a. Ka farnuin ka nu,  ka nuin ka pa, a tawpah chuan chaw ei dawhkanah nei tura thupek inpekna a thleng ta a.

Ka pain rem a ruat zung zung a, ngaihdam dilin, chawp leh chilh takin Hmingthangmawii chu kan inah a lo lawilut ve ta a. Ka sawi tawh ang khan amah hian min duh a, min hmangaih bawk a, chu chu remchanga lain ka zu ruiin ka lo awm khawlohpui kha a ni a. A chunga ka nunrawn hnu pawhin min hmangaih em vangin ka fa chu amaha nei turin thutlukna a siam ta kha a ni a. Mahse, a mah chauh ni lovin a pa tel ngeiin a nei dawn ta a ni.

Ka hmangaih loh miau vangin a bulah pawh ka mu duh lova, ka diriam a ka ngaina lo takzet a. Ka tlangvalna min laksak vangin ka haw ngawih ngawih zawkin ka hria.

Nau a neih dawn zan thlengin ka la ruih san a, a chungah țhat ka chhuah ngai lo. Mahse, a hmelah nuar hmel a awm ngai lova. Chu a hnehin ka hmangaih loh zia a hriaa a inthlahrungin a inkiltawih ngawih ngawih zawk țhin.

Hmeichhe zaidam leh nunnem tak mai a nih vangin ka chhungte chuan an duatin kan duhsak em em a, ka nu leh ka farnu phei chuan an ngaihsak lutuk hi ka lo thik deuh țhin.

Ka pa pawhin Hmingi a lo lawi ațang chuan min ngaihsak lo riau hian ka hria a. Hmingi chungah bawk chuan ka țuan leh țhin. A pum chhunga nautr pawh thla 9 a tling țep tawh. A taksa hrisel viau lo phei se a taksa pawhin a tuar tawh hlein ka ring. Mahse, a hmel a la țha reng a, a danglam chuang lo.  Mahse, chu vang chuan a bulah muin ka kuah phah chuang lo. A bula awm aiin ka țhiante bula awm ka thlang zawk.

Ka nupui, a pasal hnen ațanga hmangaihna dawng lo, mahse, a pasal chhungte'n an țan em em khawpa fel chu ka ngaihsak lova. Nau a neih pawhin a bulah awm lovin ka țhiante nen zu kan in daih. Nau a nei a, mipa a ni tih ka hriatin ka lawm a, hmingi fa anih ve tlat avang erawh chuan ka lawm vak duh lo. Thla 3 a nih thlengin vawi khat mah ka fiamin ka lawm chhin lova, a nu pawh ka ngaihsak lo. Mahse, Hmingi chu a tuarchhelin a fel em em a, kan chhungkua tinuamtu ber a ni.

Kum tam tak kan inah nui ri awm tawh ngai lo chu Hmingi a lo lawi ațang chuan ka chhungte pawh an nui dar dar tawh. Amah vangin kan chhungkua pawh a nuamin kan inpawh lah a, tunah hi chua  Hming vang chauhin kan chhung dangte pawh kan inah lo lenglut ngam ve ta. Hmeichhe fing leh lehkhathiam tia sawi tur a ni lo, mahse, mawl takin a fing si! Mo nih a tlin a  chhungkhat nu ni tuta tlin lohna a nei lo. Kan chhungkaw inrem lo a kaikhawm a, ka pa leh ka nite inbe ngai tawh lo pawh amah vangin an inbia a. Tunah zawng kan chhungkua pawh vanram ang mai a ni tawh.

Ka len dan pangngaiin ka țhiantr nen kan leng leh a. Nula rima kan titi lai chuan kan nula rim chuan a thu chhiar  chu nalh leh țha tih thu min hrilh a, chhiar ve tura min tih vangin WhatsApp a min thawn turin ka hrila. Ka titi leh ta a.

Zan rei hnu chuan kan in chu ka lut a. Seating room a țhutthlengah chuan muin ka phone ka khawih a. Hmingi bulah chuan ka mu peih thlawh lo a ni. WhatsApp ah lutin thuziak, kan nula rimin min thawn chu ka en a, H.Zate ziah , HMANGAHNA NUNRAWNG (hmar țawnga ziah a ni) chu a lo ni a. Ka chhiar a , ka chhiar zel a. Chu thuziak leh A changtunu țawngka, "Ni khat chu a lo la puitling ang a, 'tu ge ka pa?' tiin min la zawt ang a, chu hunah chuan engtin nge ka chhan ang", tih chuan ka rilru a hneh a. Ka fa hi pa nei lo ang maiin ka siam a, ka nupui lah pasal nei lo ang maiin, a rilru nat dan tur ka ngaihtuah chuan Hmingi chu ka khawngaih thut a. Ri nei lovinkan roomah ka lut a, kan khum ka thlen chuan Hmingi chu mi hriat hlau si hian a fa a bula muttirin a lo țap kerh kerh a. Ka khawngaih zual ngei mai.  A bulah chuan mu vein, mak tih hmel deuha min en chungin, "engnge i lo tih dawn?" a ti a. "Ka nupui bulah ka mu dawn!" ka ti a, mak a ti kher mai. A biangah tuaiin a mittui ka tifai a, "tun hnuah chuan keimah vangin i țap ngai tawh lovang," ka ti a. A biangah ka fawp zauh a. A hmuiah ka fawp leh a. Kha zan tluka Hmingthangmawi (Hmingthanmawii) hmel a hlim hmel mawi kha ka la hmu ngai lo. A hlimna thlen tura intiam chungin a bulah chuan ka mu ve a. Ka nupui chu a pasal pangtilum ngei nghengin a muhil ta siai siai a. Thlamuang taka ka ban khama a han muhil chu a hmel a lo țhw ngei mai. A biangah ka fawp zauh a, ka muhil ve ta a!

24 September 2017 | G

( 12 December 2017 | Thingdawl Mizoa lehlin)