KA HARH MEUH CHUAN

Pic: Internet

Ziaktu: H.Zate, Hmar Rûn

- www.hzate.in

Facebook ațanga inhria kan ni a. Ka be fova, a felin biak a nuam kher mai. A thlalak ringawt pawh ka hlimpui a. Ka tan en nin theih loh leh en nin har a ni ta. Țha ka ti satliah lova, ka duh a, ka duh mai ni lovin ka vei ngawih ngawih a ni ber mai.  Chutia ka biak fo takah chuan a no. ka dil a.

"i no. ka duh e.. a pawi loh chuan.."

"Ngatannnn???"

"Ei atan chuan a ni lo phawt a. hihi"

"Hahaaa"

A nui ringawt chu ka nuih a za a, ka zak ve deuh bawk si chuan, "hahak...... Ka tibuai che em???" tih chu ka thawn leh a.

"Whatsapp group pa1 ah kan group awmna in ang lawm" tiin min chhang a.

"hriat har awm. hihi" tiin ka chhang ve leh a. "Har lo ang..  tlem in i thluak kha han hmang deuh la i hre mai ang" a ti a. Ka theih ang ang chuan ka zawng a, mahse, ka hmu thei lo. Ka hmuh theih loh thu ka hrilh leh a. A hnuah chuan kan awm dunna group hming chu min hrilh a, a indah dan nen lam min hrilh a, ka hre ve thei ta hram a. Ka va han lawm si em!

Chanchin te inzawtin kan inhrilh a, ka ngainain ka duh telh telh mai bawk si. A taka hmuh ve ngei ka duh a, hmub ngei pawh ka tum bawk. 

Vawikhat chu ka zin hlauh mai a. Ka zinna ațang chuan biain "Engnge ka lo hawn ang che?" ka ti a. Mahse, ka sawi rual chuan ka inchhir nghal a. A chhan chu; keia thil hawn teh lul a pawm duh ka ring lo. Lo pawm duh ta pawh nise  ka thil hawn dawng turin min hmuh duh ka ring lo. Chuan, min lo hmu duh pawh nise, min hmuh hnu chuan min biak chhunzawm duh ka ring lo. Mahse, min biak chhunzawm loh leh min hmuh duh loh vanga chhuanlam a siam pawh huamin hmuh ka tum ta a.
Thil chu ka  hawn ngei a, mahse, a tan ni lovin ka țhianpa nupuiin min laksak daih.

Kan inbia a, inhmu turin kan inbia a. Ka awmna leh a awmna nen lam kan inhrilh a. "Ka lo kal ang." a tih chuan a lo kal tak tak ka  la ring chuang lo. Ka awmna tur min hrilh pawh khan chhuanlam siamin a rawn kal loh leh kha ka la ring fan.  Lo kal lo ta pawh nise ka tan cho rual loh leh phu loh a nih miau a vangin ka vui chuang lovang.

Chuan, ka beisei leh rin phak hauh lovin a hmel ka hmu ta thut mai chu mak ka ti a, ka hlim zia kha a mak zawk. Amah tluka ka mit latu ka la tawng ngai lova, ka mitah chuan khawvela thil mawi ber a tling. Khawvel hmeichhe zingah hian a va han mawi chungchuang bik tak em! Ka be tur te kha ka lai țutin ka hria a, ka han chibai tr kha ka khur deuh tlat a ni. A hmel nelawm tak leh nui sang mai kha ka tan a hlu a, ngainatawm a nih rualin ka tan ngaihhlut loh theih loh ani roh si! A mawi a, a mawi thlawt a ni. Khawvel hrehawmna tem ve tura he leia apiang mai hi ka tana thil awih har berte zinga mi a ni ta ve ang. Mahse, a lo pian ve avang erawh chuan ka hlim tlat lawi si! 
Thil leisak  ka tum a, ka pawisa dinhmun tur min venpui tak chunga "i inseng nasa lutuk ang" a tih khan ka kalman tur nen lam senga leisak mai kha ka duh.
Chuan, Thil lei tura kan kal lai vel te kha ka nuna Zarkawt pheia ka kal tawh ah chuan hriatreng tlak leh ka hriatreng tur a ni tawh ang. Thil kan lei laia a hmel mawlh mai kha hmuhnawm ka ti. Thil lei tur ai khan a hmel kha ka en duh zawk. A tan chuan ka neih ang tawkin thil ka leisak ve ta a, engmah a nih loh teh lul nen lawm taka a pawm thiam kha ka lawm takzet. Chutah, Ngam leh ngam lovin țhut khawmuan ka rawt a, kan țhu te kha, a thil ei laia a hmel mawlh mai kha hmuhnawm ka ti. duhawm ka ti a, ka mitah hian a mawi! Chuai thei lo tur nise, vul reng mai se ka ti.

Hunin min nghak lova, Aizawlah chuan awm reng thei ka ni lova, kan khaw lam pan chuan ka haw leh ta a. Ka haw dawna min thlah kha ka lawma, mahse, ka lung a leng lawk.

Kan khua ka thleng chu ka lung a lengin ka ngai em em mai a. Mahse, tibuaitu mai nih ka hlauh vangin ka be țha ngam lo. Biak loh lah ka phal si lo, ka be leh ta nge nge a. Fel taka min chhang ringawt te kha ka lawmna tizualtu a ni. Ka tan han chhai ngam chi rualah ka dah lova, a rul tawka min chhang ringawt pawh kha ka lawm tawk viau.

Ka lung a leng veng veng a, hmel inhmu lova inbiak reng zawng duh tawk loh chin a awm ve ta! Inhmuh leh ngei tumin thil kan ruahman a. 
Tichuan, Phu loh Aizawl Nula hmu tur chuan an khua, Aizawlah zin turin ka insiam a, ka zin ve ta a. 

Kei teh lul,Thingtlang tlangval min hmu leh duh kha ka va han lawm teh lul em! Ka thlen ni chuan min lo hmuak a, kan inhmu a. Ka hmu chu ka hmu hmelțha zual sawtin ka hria. A nui sen sen a, an in lam pan tur chuan kan kal ta a. An in kan thlen chuan ka insilfaina tur min siamsaka ka insil hnuin chaw ka ei ta a. Chaw ka ei zawh chuan țhutthlengah țhuin thil kan sawi neuh neuh a. Chutih lai chuan kei teh lul hi min duh ve thu min hrilh ta a nih chu, ka va han lawm tak em!  Ka lawm lutuk chu kuah ka tum a, ka han inher chu ka khum ațangin ka ke lam a lo tla a, ka harh hlawl  a. Ka harh meuh chuan khang ka thil tawn, min tihlim em emtu zawng zawng kha ka mumang mai a ni tih hriain ui tak chungin ka tho chhuak  a. Chu ni chuan ngui leh lawm kim lo zetin ka hringnun kawng chu ka zawh leh ta zawk a!

4 December 2017 | Thingdawl