ORDERS REMAIN UNCHANGED

Ziektu : H.Zate,
- www.hzate.in

"...Khawvel po povah fe unla, thilsiem tinreng kuoma chun Chanchin ṭha hi hril ro"
Marka 16:15

Khawvel ram ropui, U.S.A i fe a, Washinton DC i fang a ni chun USA thilhlu tam tak hmu i ta, Lincoln Memorial el khelah Washington Monument bakah Capitol Building hai khawm hmu ngei i tih. A mawiin a ropui a, mi tam takin an hmu châk a nih. White House lem hi chu a hmu chak ringawt khawm an tam awm ie. Chulai chun Arlington County, Virginia tieng hei inhei nawk la, chu takah chun thlan ropui tak el, America ram ropui ta dinga an hringna inhlan, tu am annnih ti hriet ta lo sipai tam tak ruong inzalna 'Arlington National Cemetary' hmu i tih. Chu thlan chu uluk takin hunbi neia vengin, an hunbi a zo pha vengtu sipaihai chu an inthleng hlak. Kum tam tak liem taa an lo thaw hlak angin, Vengtu hmasain a sawktu ding kuomah a mawphurna a'nhlan lai chun thu pakhat an hril hlak a, "Orders Remain Unchanged!" tiin.

Hi thu hin thu tam tak a hril a, America sawrkar in ieng ang thupek am a lo insuo ti hre chie naw inla khawm, ieng thu khawm lo insuo sien, chu thupek chu tuchen hin a la danglam naw a, a la pangngai zing tina a nih. Chu thupek chu a la danglam tlat naw leiin zawm zing a la ngai a, thaw dinga a ti angin la thaw zunzawm pei a ngai a nih.

Pawl 6 inchukin Hostelah ka um a. Kan senior pakhat hin English thumal 30 hi a ziek a, "hi po hi in thiem hma chu zal naw ro. In thiem naw chun ka hlap ding cheu." a ti a. A mi hlap nuom leia mi'n tiemtir a ni a. Kan tiem a, kan imu suok vieu sienkhawm thupek kha a la danglam tlat naw leiin kan zal ngam nawh.  "zal ta el ro." a mi ti hmakhat chu kan zal ngam nawh.  A hung kir a, a mi'n dawn a, "a thiemhai po zal ta ro." tia thupek dang a hung insuo char khan kan zal ngam chau a.  Thupek hi a danglam hma chu thupek kha a la pangngai a, zawm zing ding a nih.

Kum tam tak liem taah khan Isu chu kraws a hemde a a um a, a tho nawk khan a ṭhuoihruoihai kuomah inlarin, thupek ropui tak el , "Khawvel po povah fe unla, thilsiem tinreng kuoma chun Chanchin ṭha hi hril ro." Marka 16:15 a pek a. chu thupek chu kum tam tak liem ta sienkhawm, a la pangngai zing a, "Chanchin ṭha hril hi bansan ta ro." tia thupek a la um naw leiin thupek kha a la pangngai zing a nih.

Chanchin ṭha hril hi bansan dinga thupek a la um naw a, "khawvel po povah fe a thilsiem tinreng kuomah chanchin ṭha hrim dinga" thupek kha a la pangngai zing a. Chulei chun chanchin ṭha hril hi bansan ding a la ni naw a. 'A ringa baptismas changhai sandam' an ni theina ding a an hriet theina dingin chanchin ṭha hril hi sin taka nei a la ṭul rawp a.

"Anleh, an ring naw chu iengtin am ko an ta? A thu an hriet naw chu iengtin am awi an ta? Thuhriltu um lovin iengtin am hrieng anta?" Rom 16:14 ti ziek ang khan Chanchin ṭha hi ei 'uṭawk tur vawn' ringawt ding a ni naw a,  Ama an ring a, an kova  an hriet a, an awi ngei theina dingin a hriltu a um a ngai a, ei  hril a einpuong hi a ṭul a nih.
"Tir an ni naw chun iengtin am thu hril an ta?' Rom 16:15 hi a mi tirtu ei nei a, Ram po pova fe a thilsiem tinreng kuomah chanchin ṭha hril dingin a mi tir a, chu a mi tirna chu tu chen hin a la danglam naw a, a la pangngai zing a. Chulei chun, Chanchin ṭha hril hi ei la sunzawm pei a ṭul a nih!


18 Feb 2018 | Thingdawl
http://www.hzate.in/