INKHAWMPUI, AW INKHAWMPUI!

- H. Zate
  www.hzate.in

Inkhawmpui ei ti hin eini lai chu Inkhawmpui le rorel a ni kawp tlangpui a. Chu umzie chu inkhawmpuiah chun ro ei rel ngei ngei tina a nih. Kum tina Inkhawmpui hlak an um a, Inkhawmpui kher lova Inkhawmpui nei naw kumah khawm rorel inkhawm nei el hlak ei um bawk.

Baptist Church Of Mizoram (BCM) hnuoia ṭhalai pawl hi Ṭhalai Kristian Pawl (ṬKP) ti a ni a. Pawl pumpui inenkawlna a ni pha MṬKP (M - Mizoram) ti a ni hlak. MṬKP Inkhawmpui hi kum hni dan peiah hmang a ni hlak a. Kum 2016 khan Lawngtlaiah an hmang a, Kum 2019 khin Tlabungah hmang nawk an tih. Chu inkar, kum 2017 le kum 2018 a chun rorel chau neiin rorel palai, an inkeiṭhuoina dana inziekhai chau an fe hlak.  Hieng anga thil thaw hi a hadamthlak a, sumseng a tlawmin inkhawmpui khawm a hlungin a hlu hlak!

Inkhawmpui tlung ding hin a tlungtu/dawltu an inbuotsai nasa em em hlak a. Kawng tinrengah mikhuolhai lawmna  intlun naw le tlung zo naw le ropui naw bik inlauin an inbuotsaia, an inpuocha mup mup hlak. A tlungtuhai inbuotsaina chu thuhran nisien, a fe dinghai inbuotsaina khawm hi a nasa a nih. Inkhawmpui hmang dinga inbuotsaina a hau intak em lei le tulai ei ngirhmunin a zir ta naw leiin Inkhawmpui lien tak tak a kum sira (kum tina) hmang le nei hi bansan a hun ta hle.

Inkhawmpui lien le rorel tlungtu inbuotsaina ṭhangpui dingin MṬKP chun kum tin member tinin cheng 10 an thaw khawm hlak a. Tukuma inkhawk khan cheng 20 a suksang a nih. Member 20,000 an lo ni chun 20,000 × 20 = 4,00,000 vel a hung suok a. Kum thumah chu 3 × 4,00,000 chu 12,00,000 a hung tling a, ( Maktaduoi khat le nuoi hni / Nuoi sawmpahni ) Inkhawmpui tlungtuhai ṭhangpuina dinga thil ṭangkai tak el a ni awm ie!


Tukum 2018 a Hmar kohran lien pahni ICI le EFCI, KṬP chun inkhawmpui lien ( ICI @Rengkai, EFCI @Muolhoi ) an hmang a. Inkhawmpui palai an tam bek nawh. Ka ruolpa Pensionthang Puruolte chun EFCI KṬP Inkhawmpui palai chu 1000 vel niin a hril a, Ka ruolpa Joshua Amo (Jr Amo) chun ICI KṬP Inkhawmpui palai chu 400 veli niin a hril bawk. An hril zat hi indik chie naw sienkhawm a awm tawk vel chu a ni awm ie. Ka ruol  ṭhenkhat inkhawmpui an fe naw san ka'n dawn chun, *"Kalman sengso a'n sang taluo a,"* tiin an mi dawn a. Mani hmang ding khelah kalman ding la hei intum ding chu thil hau intak tak a ni awm ie. Sakawrdai, Mizoram a inthawkin Rengkai pan ding nisien mi tam tak ta ding chun kalman ringawt khawm a harsa awm ie.  Muolhoi pan khawm a awlai bikin ka ring nawh. Ka lo huphurpui khawp el.  (PCI Mizoram Synod KṬP chu West Phailengah inkhawmpui an hmang a. Mikhuol sing hni an chuong hem el. An ni chu Member khawm Nuoi an chuong a, a awm ve tho.)

Mani sum senga inkhawmpui fe hi mi tam tak ta ding chun thil intak le harsa a ni ta a, phurrik a tling tah. Chulei chun thaw dan dang zawng a hun tah. A ni ngei, tuhin chu inkhawmpui fena ding hin mani pawisa seng ngai ta naw nih! Mak i ti el thei. A mak bek nawh. Inkhawmpui  hma kum hni khat chuong umah khan bielin inkhawmpui fena dingin Budget lo siem sien, chu chu unit tinah target sem nawkin, Unit tinin an target seng hung  sunglut anta, a tawpah chun mani pawisa fai suok lovin inkhawmpui hlim takin an hmang el ta ding annawm!
Entirna dingin; EFCI KṬP chun tukum inkhawmpui an hmang a, Kum 2021 (ka hriet suol naw chun) an nei naw chau ding a na. A hmun ding an lo hriet lawk ta lem chun a awlsam a, an hriet lawk naw khawma  awm tawk sutin Kum 2021 a Bus pahni pathum hmang theina ding tawk kha sutin, Cheng 1,00,000 a lo ni chun chu chu kum 3 in sem nawk sien, kum khata ding chu Cheng 34,000 vel a hung ni a, chu chu kum khata biel sunga unit tin haiin target insem nawk hai sien, Unit 10 an lo um chun 3400 seng damin an insem thei awm ie. Unit lien le chin ruok chu inang thei naw tawp a ta.  Chuonga kum 3 an thaw chun harsa bek bek lovin hlim tlang takin inkhawmpui an fe el ta hmel!


Tuta ei fe dan del del, Inkhawmpuiah *mani kalman intum* ang chi hi ei la fepui ran chun Inkhawmpui ṭiek nawna ram ei tlung hma hin chu member rethei ta ding chun inkhawmpui fe nawna lampui hi lampui awlsam lem a ni rawp hmel!

... ti dam hi ka imu suok, in thei si naw pumin ka ngaituo ta vel mei mei a!
In rengin hun hlimum tak hmang mawl ro!

08 March 2018 | Thingdawl
- www.hzate.in
+919402125273