REASON

Ziaktu: H.Zate
- www.hzate.in

Canada mi, Zaithiam leh Hlaphuah thiam,  aw mawi leh ngaihnobei em em mai,  Shania Twain - in mawi em em a a sak,   'From This Moment' hla hi i ngaihthlak tawh ngei ka ring. I la ngaithla lo a nih pawhin he thu i chhiar hnu tal hi chuan lo ngaithla ve chhin la.
He hla 'From This Moment' hi  Robert John Lange nena an phuah niin,  Hmeichhia-in a pasal neih ni, a pasalin a kuta zungbun a buntir zawh chiaha a sak ni awm a mawi hla a ni a, a rilin mi a fan hneh a. A ruk takin mi a hneh em em a. A satuin a sa thiam bawk a, ngaihthlak nawn awn awn a awl a, a satu mai bakah a hla hi  ngaihzawn a awl a, beng a titlaiin ngaihtuahna a fan lo thei lo.

I give my hand to you with all my heart
I can't wait to live my life with you I can't wait to start
You and I will never be apart
My dreams came true because of you

tih lai te hi aw.....
A thinlung zawng zawng nen a kut a hlan a, a nghahlelh em vangin a kianga nun hman hun tur kha a nghak thei tawh lova, bul ṭan thuai thuai a duh tawh a, nghak reng thei a ni tawh lo. Chumi ni leh hun aṭang chuan, 'Engmahin min ṭhen tawh lovang' tih chu a sawi theih chhun leh a duhthusam a ni a. Ni e, chu a duhthusam, a lo sam fo ṭhin, a kianga nun hman hun ngei chu a takin a lo thleng dawn ta a,  'Nangmah vangin ka duhthusam a thleng dik si!' a ti lo thei ta lo a ni. Ni e, 'Ka duhaisam kimna i ni' te pawh a ti mahna..

He hla ami tho,
' You're the reason I believe in love '
tih lai te hi a va han ril lehpek em aw! Hmangaihnaa rinna ka nghah chhan i ni! emaw Hmangaihna ka rin chhan i ni te pawh kan ti duah thei awm e. Hetiang hian tu emawin min han ti ve reuh se Vala hi kan awn ruai ruai mai awm e! A ni kha zawng awm lo se 'Hmangaihna' hi hmangaihna a ni tih a ringin a pawm ngai awm si lova, mahse, a ni kha a nunah a lo lang a, a ni ngei kha hmangaihna a rin chhan a ni si a.


He hla tlar a, 'Hmangaihna a rinna ka nghah chhan i ni e!' han intih tawl mai hi ava han hlu dawn tak em. Mi ṭahna thlentu leh an ṭah chhan nih ai chuan Hmangaihna an rin chhan han nih chu a lawmawmin a ropui ngawt ang le. Tu mai pawh hian kan châkin ka ring.

Keini Krista zuitu intite hi miin Krista an zui ve chhan leh Kristaa rinna an nghah chhan kan ni tawh em le?  Tlangval rui pakhat chuan zaipawl membar pakhat chu kawkin, "A ni vang sawn zaipawl hi ka ring lova, Kohhran ṭhalai pawh hi ka rin loh phah," a ti bawrh bawrh a. A chhan ka zawh chuan, "a lang chauhin rawng a bawl a, a lerhin ruihhlo a ti tho si a," a ti a. Heta 'chhan' , zaipawl leh kohhran ṭhalai a rin loh chhan nih hi chu a chakawm lova, a lawmawm loh. Chumai a ni lo, a ngaithlatu tan pawh ngaihthlak hrehawm tak mai a ni.

"Anni hi vanram an kai a nih chuan ringlote pawh an kai tho ka ring," , "Kohhran Hruaitute pawh ka rin loh chhan chu amah vang hi a nia," a ti pang pang a. A thu chu enga pawh lo nise, kha thil a rin 'chhan'  kha a ni pawimawh leh ta chu. Miin kan rinna leh a rawng kan bawl Krista thlenga an rin loh 'chhan' nih hi thil pawi leh hlauhawm tak mai a ni.

"Amah vangin Isua ka rin phah a," tia an sawite, "amah vang hian Kristian nih ka chak phah," tia an sawi nih te hi a sin nuam tur chu! Hetianga a ṭha zawnga 'chhan' nih hi kan tum tur a ni a, keimahni vang hian tu emaw talin inkhawm lo chak phahin Krista lo hnaih phah se tiin kan bei fo tur a ni. Mi dang tena Krista an belh chhan leh an rin chhan nih hi kan tum fo tur a ni a. Chumi atan chuan chhel takin kan tuarin ka bei tur a ni.

Kristian te hi Krista rawng kan bawlna kawngah hian a chhe zawng ni lovin, "You're the reason i believe in love!" a tih ang hian mite hian, "You're the reason i believe in Christ" min ti mawlh teh se!

06 March 2018 | Thingdawl
- www.hzate.in