Ziektu: H.Zate,
- www.hzate.in
Thuvar 17:8 Thilpêk hi a dongtu ta ding chun lunghlu ang a na;.. ' BFTW
Kum 2016 khan Mizo Zirlai Pawl Sub-Headquarters ; Thingdawl-ah President ka ni ve a. Sikul 'kan suok' le Inchuklai harsahai ṭhangpui kan rel bawzuiin Kan huom sunga inchukna in po po kan kan a, an harsatnahai indawnin kan thaw thei ang angin kan ṭhangpui a. Ṭhenkhat Zirtirtu indai naw sawrkarah hma kan lakpui laiin ṭhenkhat ruok chu an sikulah ni khat dam kan inchuktir ve a. Ṭhenkhat ruok chu ṭhangpuina tieng ni lovin chawimawina dam kan inhlan a. Inchuklai harsahai khawm a thei ang angin kan ṭhangpui a, ṭhenkhat lekha inchawkna ding kan pek laiin ṭhenkhat chu an fee bat kan pekpek tawl a. Thil ropui le ṭha tak kan pek thei chuong nawh, anachu, An lawm thei khawp el.
Chulai chun, zan khat chu inchuklai pakhat a pi leh chau um ṭhangpuina pe dingin kan fe a. Lekhabu pakhat inchawk naw a nei leiin chu chu man ding pe dinga fe kan nih. An inah kan lut a, Cheng 250 chu a lekhabu man dingin kan inhlan a. Chu pitar chun a mittui/mitthli inleng kieng hin lawmthu a hril mawl mawl a. Mitthli tla ka hmu ta ah chun ka lungril hne tak a la nih.
Chu taka inthawka ka thil hriet suok chu; 'thil hi a changtu ngirhmun ang pei hin a hluin a hlu naw a. A lo tiem le inkhitu zirin a hlut dan a dang el a lo nih.'
Kha ṭuma thilpek kan pekhai kha thil ropui le ṭha kan pek nawh. Sienkhawm, a lo dawngtu le a lo inkhituhaiin an inkhi hlu leiin an lawm a nih. Lo ngaihlu nawtu ta ding chun Ni khat class lak sawk dam, office dawrpek le cheng 250 hai chu iengtina khawm a ni nawh. Sienkhawm, thulpek hi a dawngtu leh ngaihlutu ta ding chun a hlu a nih.
Kan khuoah hin Ruihlo ngaihai enkawlna 'Hmangaina Home' a um a. Hmasak el khan Nuhmei, ruihlo ngaihai enkawlna ding in thar an bawl chu an hawng a. Chu taka thu hriltu nu pakhat chun, "Iengleia Pastor hai le nu le pa tam tak hi an nauhai leh inkhawm dinga an fe diel diel thei hi lawma Pathien kuoma lawmthu hril ngai naw am an ni ka ti hlak! Ka naunu chu ruihlo ngaiin a buoi a, nikkum krismas kha hlim takin, Hmangaina Home le Pathien zarin kan hmang a, kan inkhawm ve thei a, ka lawm bek bek el a nih." a tih. Ni ie, kum tam tak sungkuo kima inkhawm thei ta lo, inkhawm chu hril lo, hlim hmel khawm inhmu ngai ta lo ta ding chun hlim taka Krismas an hmang thei ringawt khawm kha lawm a um a, lawmpui an um takzet a nih.
Hi nu ang deu hin kan ina leng pakhat chun ka nu le pa kuomah, "in nauhaiin Ziel takngiel khawm an thaw naw hi lawm hle ro. " a ti a. A nauhai ruihlo bawia intang hai ngirhmun a en a, ruihlo laka buoi ve naw nau inhnarin a hun a hmang hlak thu a hril.
Thilpek hi a dawngtuin a lo tiem dan le inkhi dan zirin a hluin a hlu naw hlak a. Guwahati-ah sawt nawte ka um lai khan ka ruolpa, Pensionthang Puruolte chun Pathienni zat a thlawnin inkhawm dingin a mi phur hlak a, ka lawm thei em em a, lawmthu ka hril lai chun, "iengkhawm a ni naw kha, chuong naw la khawm ka de ding tho annawm," ti chauin a mi dawn hlak a. Anachu, ka ta ding chun a hlu a, cheng tam tak ka sengna ding ka seng naw pha lei khan ka lawm em em a nih. Bel ding ka nei naw laia ka bel, Guwahati a EFCI Pastor, Rev. Lalmuongthang Ṭhiek hai chungah dam hin lawm naw thei ka ni nawh. An ina ka um sung khan a thlawnin an mi chawm a, ka fak hek char char a, thaw hlak ka nei si nawh. An hlawkna um suna ka ring chu; bu du hrim hrim hi ka nia, ka bu fak an hmu lei khan an bu fak a lo inhnik pangpal hlau chun, chu chu an hlawk vena um sun a ni el hmel ie. An lakah hin lawmthu bang lova hril ka bat a nih. EFCI Kohran mi le sa ka ni naw thu ka hril ngun po leh mi ta nei thiemtu Guwahati EFCI Kohran le ṭhalaihai chungah dam lawm naw chi ka ni nawh. Ṭhalai Sport an nei dingah inkhel ngai met lo hi Sports Organising Committee ah an mi hei sie a. An mi ta nei thiem em a, kei khawmin ka ta angin ka en naw thei naw a, An kohranah ka'n hnik hman ṭhel annawm ie!
Ni tin, harsatna um ṭhak lova inhnawm theia um ringawt khawm hi a hlut zie hrechiengtu chu tawl na invawihai an ni a. Hrisel hlutna hrechiengtu khawm mi bawrsawmhai hi an ni awm ie. Nau fel nei hlutna hretu chu nau suol neihai hi ni ngei an ta, nau fel inhnarin an inrum rawp hlak a. Sung kim taka Krista rawng bawl inhawi zie le hlutzie hrechiengtu chu sung kim taka rawng bawl thei nawhai an nih. Bu fak ding nei hlutzie hretu fak ding nei nawhai hi an ni a. Cheng 1 hlutna hre ding chun cheng 1 khawm nei naw a um a ṭul rawp hlak. Thil hi ei nei lai le a um lai chun a hlutna hi hriet a lo intak khawp el a. Hmar hmeruo um naah ei um lai chun a hlutna ei hriet bek bek naw a. A um nawnaah ei hei um zet chun Anphui khawm a hlu a, Sizo khawm a hlu em em hlak. Ei Sawrkar hma lakna Clean India Mission dam hi a hlutna hre ding chun hmun ṭawpa um a ngai! Zalen taka um a lo inhawi zie hre ding chun hmun zalen nawnaah um a ngai a. Muolhoia Ka ni Haunu chun Dierkeihai leh ei buoi laia curfew leia tuol suok thei lova um a rinum zie hrilin, "Curfew kar laka suok theina thu an hei insuo zet kha chu a hlu a nih," a ti a. Ni ie, Zalen taka um hlak ta ding chun zalenna hlutna hi hriet naw ve thei deu a nih.
I ni tin nun kha miin an inhnar hlak. I nu le pain zing tin inhma tawk takah an keitho hlak che a, i nghawk em em lai khan, keithotu ding mamaw ngawi ngawi ṭhalai tam tak an um a. Chuonghai chun an inhnar hlak che. Pei naw em ema sikul kai , Sin thaw a, Biek In i pan chang dam khan, Sikul kai thei lo, sin thaw thei naw, Biek In pan nachang hre ta lo ṭhalai tam tak an um i sawn naw? I shikhar fak khaptu ding che an la um dam kha lawm hle rawh!
I nauhai leh inri bur bur a, rihau so el a bu infak hlak lai le an inhuot taluo leia i nghawk vel el hlak lai khan nau dit em em a nupa inen hrek hrek hlak an um a. Nau dit leia nupa inhmangai em em khawm inṭhe pha hiel an um i sawn naw?!
Thil thlawnpek a dawnghai a mal mala tiem a , a petu inpak nachang hre hlak mi hi mi vangnei a ni a. Pek belsain a um hlak. Thil thlawnpek hi ngun takin a mal malin tiem la, 'ka lo va vangnei bik de aw!' tia a petu inpakin lawm ngei i tih!
28 April 2018 | Thingdawl
No comments:
Post a Comment