 |
| Apps tlangzarh lai |
~ H.Zate
www.hzate.in
Cambridge University emaw Oxford University emaw te iang ve pha lovin, Tute sikul emawni, St Paul’s leh Delhi Public School te tluk pha ve mah suh se, ‘Hlim leh lawma kan lenna hmun, Thiamna runpui JNV’ hi Ex-Navodaya’n te tan a hlutna a nep chuang lo!
A ri ret ret kan hria a, Ex-Navodaya’n Senior ten hma an la , JNV Thenzawl Principal hmalakna leh remruatnain JNV Thenzawl kum 1987 a din tawh chuan 02 Dec 2016 ah Alumni a ko haw dawn tih chu kan tan hriat a va nuam si em!
A hun a thleng
Kum 2016, December Thla, Ni 1, Ningani ani a. JNV Thenzawl a Tleirawl/Rawlthar nun hlu tak lo hmang ral tawh mi tam tak chu an rilruin Thenzawl lam a hawi thuap a, A kal ve lote pawh an bang chuang lo. Kal lote hlei hlei kha kal chak an ni. Mahni remchan ang ang leh thian ho inthurualin Ex-Navodaya’n ho chu kan nunhlui hlu tak awmna JNV Thenzawl panin kan kal sang sang hlawm a. Thenzawlah kan zirlaipuiten min lo hmuak a, kan han inhmu khawm zet chu lawm avang hian mittui a lo far thei chiang kher mai!
Ex-Navodaya’n Hawkhawm Runpui hmang turin, ‘Kan in, Kan Tleirawl nun kan hmanna in’ ngeiah chuan kan haw ta sang sang hlawm a! Nghakhlel tawh hlawm lutuk vanga remruattute remruatna zawm hlei thei lo pawh kan awm ! Keini, 18th Batch (2004) zinga mi, Malsawmtluanga, Remsangpuia (a.k.a Zothanpuia ) leh kei chu Bike in Aizawl atangin Thenzawl kan pan a, Aizawl atanga Hmuifang thleng Puia’n min phur a, Hmuifang atanga Thenzawl erawh Sawmtluanga’n min phur thung. Kan chak lutuk hi thlen theih loh kan hlau ani ber hlawm e. Thenzawl kan thleng ve ta ngei a, a nuam kher mai. Khami zan khan Ex-Navodaya’n Association chu din ani a, Thenzawl chu kan inpui a nih angin a sap tawng tak pawhin, ‘Headquarter’ atan kan pawm ta a nih kha!
Hawkhawm Runpui Chu
02 December 2016, Zirtawpni zing dar 9 ani a, kan za et et hlawm tawh ani ber e! Kan batch ami, Nautea of Champhai pawh ‘haw’ tum ve lo kha hemi tuk hian Aizawl atangin a la rawn kal a nih kha!
JNV pengah kan innghak khawm a, Kan chak et et tawh hlawm bawk ani ang e. Pilot aia tlan hmasa pawh motor 3 vel chu an awm tlat!
Kan khuaa let a, JNV a haw thin kan ni bawk a, tun tuma kan haw pawh hi hlimawm kan ti tlang. Haw ve thei lote rilru ah an awm lo thei lo.
Peng aṭangin kan tlan ṭan a, Pu Dr Marenga, 1st Batch Motor ah Senior te 2 nen , kei nen 4 kan chuang a, Thenzawl kan han fang zet kha chu a mi tham dan a va dang tehlul em! Bazar veng atanga Vengchhak/Vengthar panna kawng chho te kha zawl ta riau a ka’n hriat chuh! Kum 23 hnua an vawikhat hmuh lehna te, kum 20 hnua Thenzawl an vawikhat hmuh lehna te a ni nawk hlawm a, lunglen vangin biangah mittui a luang lo chauh ani ber e.
JNV Campus bul kan thleng a, Thlawinem lui bulah kan innghakkhawm hlek a, thenkhat la inhmu lo te kan han inhmu nak nak a, an inngai lutuk hi, “Ka ngaih zia che hi e, nang meuh pawh hian min hnem zo lo!!” tia inhril te pawh an awm tain ka hria.
JNV Thenzawl Campus chu kan han tlan lut ta sang sang a, Zirlaite leh Zirtirtuten min lo dawngsawng a, kan han inhmu hlawm chu kuta inchibai mai hi a tawk tawh lo. Inkuah meuh pawh hian a la fiah zo lo a ni ber e!
Kan han inkawm sang sang a , darkar chanve vel kan hahdam hnu chuan JNV Thenzawl Alumni Meet 2016 chu tan ani ta. Zirlaite zawng zawng pandal ah awmin kut an beng a, Zirtirtute an lo intlar a, keini Ex-Navodaya’n ho chu intlarin kan kal a, Zirtirtute chu kan chibai zel a, a chibai zo chu dawhsan lamah min lawntir zel a. Min va han duat thiam tak em aw!
Pu MP Singh, PGT Economics in inkhawm a kaihruaia, Ex-Navodaya’n te lawmna thu tawite , Pu Ramkesh Bairwa, Principal, JNV Thenzawlin a sawi a. Kum tina neih ṭhin tur Alumni Meet chu kuminah a bul kan tan chauh thu leh, Ex-Navodaya’n te chu JNV tana an rilru seng thar a, JNV hmasawnna tura theihtawp chhuah turin a chah. JNV Thenzawl Zaipawl ten mawi em emin hlain min awi a, an va thiam tehlul em! Ex-Navodaya’n ten mahni hming leh nihna te sawiin inhmelhriattirna kan nei hlawm a. inhmelhriattirna ni mahse thu tam tak sawi ta vak pawh an awm nuk e! A mawh love, an lung a leng ve em a tin a ni.
Chhunah Thingpui leh chhang tui tak kan ei a, hlim takin kan inkawm a, chawhnu lam hun erawh chu Ex-Navodaya’n te pual bik ani a, a duh tan thu sawina hun hawn ani a.Thu kan sawi sang sang hlawm a, kan hlim tlang hle. chutih rual erawh chuan lawm a kim lo, 1987 batch a tanga vawiin thlengin mi 39 in an chatuan ram min lo lawisan tawh si a. La awm ve se an hlim ve dawn vei nen. Kan theih tawk , kan hrereng ani tih lantirnan An mahni pualin minute khat hun kan hlan a. Nakinah, khita hming an lam hunah kan la ‘awm’ tlang dial ang chu.
Rokhawlna dang vanga rawn tel thei ta lo te pawh rilruin a hre reng a, keini nuam kan tih tluk zet khan kal ve thei lote khan kal ve an chak si a!
Hun hnihna kaihruaitu, Pu Dr Marenga, (1st Batch) in thusawi tur a ko zel a, a tawpah chuan kan batch lam chan a rawn thleng a, midang pawh kian lovin, thianten min phut bawk nen dawhsan lam chu ka pan ta a. Zirlaite chu thianghlim taka nun hmang a, an tu leh fate hnena uang taka an sawi ngam nun hmang tura fuihin ka thuziak dahkhawmna, android apps, H.ZATE tia vuah chu 1st- 5th Batch , Zirtirtute leh Principal chu tlangzarh turin ka sawma, an ni’n a duh apiang hman theih turin, 02 December 2016, Zirtawpni khan an tlangzarh ta rup mai ani. Nuam kan ti tlang ani ang e, kan zingah hlim lo hmel reng kan awm lo. JNV Thenzawl Zirlaite an fel a, zai leh lam an thiam narawh e! Program a zawh chuan Kan batch bik chuan kan Rawlthar/Tleirawl nun kan lo hmanna JNV Thenzawl chu kan fang kual a. Ṭhianhoa han awm chu nuam kan ti lutuk hi kan ‘a’ deuh huih vek mai ani. Kan kalhna apiangah thla kan la , kan inkham lo chu a ni ber e. Assembly courtah thla kan han la a, mahse, tun hmaa kan lak ang ani ta lo; kan tlem tawh riau, hrehawm khawpin kan tlem a ni ber e!
Lunglen tizualtu ting a tana kan sulhnu te kan fan hnu chuan Dining Hall lamah chaw ei turin kan kal a. A ngai ang patin kan han intlar leh a nih kha! Kan intlar dan ngai mahse, intlarpuite an dang tawh si. Rilruah kan hunlai, Navodaya’n kan nih ve lai, Pawl ruk atanga senior kan nih thlengin a rawn lut zawt zawt mai a. Lung a leng duh ngei mai. Kan thian kal ve lote kan hrechhuak lo thei lo.
JNV Thenzawl fachuam te kan ni bawk a, chawhlui tuitak min lo buatsaih sak a, ava han tuiin ava han nuam tehlul em!.
Chaw ei khamin kan kal laia kan inbualna thin, Vanva lui enin kan kal a, a hmun leh velten lunglen an kai tho ngei mai! Mahni chauh chuan ni ila mittui far fap fap khawpa tah mai a awl awm e! Nuam tiin hlim viau mah ila, ni kan chelh ding zo si lo, kawlah ni a liam riai riau tawh mai si. kham lo leh thinlung za et etin JNV Thenzawl chu kan kalsan ta hlawm a!
Mi te sikul anga ropui leh mawi ni mah suhse, Kan tan a mawi si.
Mi ropui ten enkawl lo mahse, kan nun bul tanna ani tlat.
He sikulah ngei hian hmangaih tam tak an intawng a, nupa hial an lo ni tawh! He sikul leh a chhunga room ah te hian, hmanah chuan nui ri mawi tak tak a lo awm a, hmangaih Biahthu an lo inhlan a, nun hi a lo mawi thin. Hmangaihna vanga mittui, leh lawm avanga mittui chenin. He sikul ngei hi kan nun kan lo hmanna ani a. Mahni khuaa haw lova JNV Thenzawl a haw thin kan nihna ringawt pawh hi a dangdai bik ani.
He sikula i va kal ve chuan, dawhkhan leh thutna te kha, Tleirawl rilru thianghlim tak tak lo thut tawhna ani tih hria la, a room tin mai te kha an nun pum an lo hmanni ani. Mittui tam tak sur mahse, nui ri tam tak a awm a, lungngaihna phena lawmna an hmuhna ṭhin a ni a. Beidawnna phena beiseina an lo chharna ṭhin a ni. He sikul ngei atang hian Doctor, Engineer, Army, Civil Service leh Zirtirtu thlengin an lo chhuak tawh.
A chhunga thil awm te khan lo hrilh lo che mahse, he hmunah ngei hian inṭhianṭhat hlutna, hmangaina awmzia, leh finna leh thiamna te kan chhar an i tih min lo hriatsak dawn nia!
A tawpna’n, ‘Hlim leh lawma kan lenna JNV vul reng rawh se!’
03 December 2016 | Aizawl
thuziak dang @ www.hzate.in
No comments:
Post a Comment