Ziektu: H.Zate, Hmar Rûn
Naupang leng chun an ina mei var liet liet chu enin a fe pei a, in a tlung a, kawt a hei hawng tawm chun, ‘ Nu’ tia a nu ko hmasain inah a lut hlak! Zohnathlakhai laiah hin chu, ‘Nu in zal tah maw?’ ti am anih bek hril lova mani ina lut hlak hi an um kher ka ring nawh. Nu chun a nau fena a hriet a, a’nlawi hun ding chena nghakin, a’nlawi a, a zal pha leh ngaingam takin a zal ve hlak. Nu hi nau ta dingin thlamuongna a ni a, innghatna niin, hlimna le hnemtu a ni bawk hlak. Bishop Thomson chun hi thil hi a hrietchieng em leiin, ” ‘Nu’ ti thumalah hin lungril hlimna iengzattakam a inphum ding aw?” tiin indawnna le thu a lo saksuok hiel reng a nih.
Naute ta ding lem hin chu thlamuongna an va hei ni chieng de aw! Nu kut chela naute thlamuong taka a in hlak hin nau ta dinga nu hlutzie a suklang ve awm ie!
Nuhmei chun a sungkuo maksanin, sungkuo dang a zawm a, a ta ding ni lo, mi nau ding nei dingin a pasal a pawm a, a nunghakna inhlanin, a hnam,a nina a iengkim inhlanin a pasal a pawm hlak. Chu nuhmei, Nunghak chu nau hung neiin nupui a hung nia, ‘Nu’ tia ko a hung ni chun a theina le a hratna po po chu a sungkuo, a pasal le a nau ta dingin a inhlan a. An ta dingin a nun pum a hmang a, sungkuo tha a indin hlak a nih. ‘Nuhmei var chun a in chu a bawl a, Nuhmei invet ruok chun a kuthaiin a thiek hlak.’ Thuvarhai 14:1 (Bible, BFTW) ti thu bible ah ei hmu a. Pa hi sungkuoa thu neitu ni sienkhawm, sungkuo indintu tak chu Nu hi a nih. Hi lei hi annawm, William Carey khawma, ‘Sungkuo hlimna chabi kawltu chu nu a nih.’ a lo ti a. Sungkaw inhawi le inhawi naw chu nu a fel le fel naw a inthawkin an lo inkhi hlak.
Hieng ang lawma Nu hi Sungkuoa a pawimaw lei hin nu ta ding khawm hin Sungkuo hi a pawimaw naw thei nawh. Sungkuo hi a lalram le a mawina a ni a. Nu fel le thain a enkawl sungkuo chu a’nhawi a, sungkuo inhawi chu nauhai ta dingin Paradis a ni hlak. Nu tha nawin a enkawl sungkuo chu a kawi a, mi hmusit a ni chang a tam. Nu thang naw sungkuo lem chu a khingbai a, hi lei hi annawm, Kohran rawngbawltu tam tak, nuhmei chan ta khawm nuhmei an ngaituo pek rawp hlak. Hieng lawma nu ta dinga sungkuo le a nauhai enkawl a pawimaw lei hin, R.A Torrey chun, ‘Nuhmei ta dingin nu indik tak ni tluka sin inzaum khawvelah a um nawh.’ a lo ti hiel a nih. Nauhai mawina chu nu ta dingin chawimawina ani a, nau nuhmei hmingthatna chu Nu ta dingin ruollaia hmai-uong taka siemtu a ni a. chu ang bawkin, Nau hai hmingsietna chu nu ta dingin muolphona a ni a, a ropuina sukhnawmtu a nih.
Nu tha hin sungkuo chau ni lovin khawtlang a keithuoi thei a, khawtlang el khawm ni lovin hnam khawm a keithuoi thei a nih. Nuin a nauhai a biekna tawng pei chu a nauhaiin an hung hmang a, an lungrila nghet tak khawm a ni hlak. NU inchuktirna baka nau ta dinga innghatna le a lungril hnetu a um nawh a. Nu tha inchuktirna chun nau tha siemin, sungkuo tha a siem a, chu sungkuo tha chun khawtlang tha a siem a, chu khawtlang chun hnam tha a hung insuo nawk hlak. Hi lei hin Pu George Herbert chun, ‘Nu tha pakhat hin zirtirtu 100 a hen/tluk a nih!’ a lo ti hiel reng a nih.
Nu hmangaina chun chan a huom a, a nau ta dingin tam le nat tuor a’nhuom hlak. Nu chun a nau hlimna a ni ding phawt chun a ma a nat lem khawm a thlang a. A nau beiseina sukhringtu a ni ding phawt chun, beiseina le suongtuona a lo nei po po hnawlin a nau ta dingin a inhlan hlak a. Nau ta dinga bel ngam niin, harsatna intlunna tak a ni hlak. Pa kuoma an hril ngam naw tam tak hi nu kuomah hrilin, nuhmei ta ding lem chun nu hi an ruol tha niin, an lungril iengkim an hrilna a ni a. Nu le naunu inngei baka tha a um nawh. ‘Nu var chun a nau mani inveng dan a’nchuktir a, nu invet ruok chun a veng hlak!’ (H.Zate) Nu tam takin an nauhai an veng a, an veng seng naw tam tak an um a. Nu thenkhat ruok chun an nauhai mani inveng dan an inchuktir a, khawlai hmunah khawm um hai sien an ni an inveng el ta hlak. D.L Moody chun, ‘ Khawvela nu po po hi ka nu ang nihai sien lung in ngai naw ni!’ tiin a nu that zie le a nu inchuktirna leia a tlung ding chen tlung a, a ni ding ang ni thei a ni zie a hril.
Napoleon Bonaparte, Khawvel roreltu, France sipai hrat khawkheng meu khawmin, ‘Nu thang naw chun khawvel hi thlaler ram tawl, tui um nawna ang a nih.’ tiin Nuhai pawimaw zie a hril a. A nu leia khawvelin a hriet khawpa mi ropui ni thei a ni zie a hril hiel a nih.
Nuhai hi sungkuo innghatna lungphum an nih. Nu thang naw chun sungkuo a buoi a, a kim nawin a ruok huoi hlak!
NU hmangaina le inchuktirna hi nauhai ta dingin nu thuoitu a nia, Nu a pawimaw em lei hin Spain Thuvar chun, ‘Puithiem zakuo fuol nekin nu puonbil hmawr inek khawm a hlu lem!’ lo tiin, puithiem ropui tak tak nekin nu tlawm tak inchuktirna hlut lem zie a suklang a nih.
Khawvel ram ropui, Khawvelin Pa ena a en a President, Sal insuona dar vuotu, Pu Abraham Lincoln chun , ‘Ka bat hi tlak ding ni lang, kanu laka ka bat hi ka huphur tak.’ a lo ti a. Nu ropui zie le hlutzie a hriet chieng hle a nih. Hi hmangaina, nu hmangaina ngei hi khawvel nau po po ta dinga rul seng naw bat chu a ni a. Nu nei ta phawt ta ding chun, nu hmangaina, rul seng naw bat hi rul seng naw ding nisien khawm a tlawmte bek lo peklet ve thei a ni tak duoiin tia hmangai let ve hi ei bat a nih.
E.H Chaplin meuvin, ‘Nu hmangaihna thilthawtheizie hi ieng tawng khawmin a hrilfie zo nawh.’ a lo ti lei khawm ni lovin, nu hmangaina thil thawtheizie le nu hmangaina le a pawimawna hi chu hrila fie zo chi a ni nawh. Nuhai hi an ropui a, nu hmangaina tluka inthuk le ropui a um nawh. Hi nuhai hmangaina ngei hi a nih ‘Rul seng lo bat’, khawvelin a nei chuh!
Nu po po, Nuhai Ni chibai le!
12 May 2017 | Guwahati
No comments:
Post a Comment