INNUI SEIH LA!

Model: Ruth Khawbung,

Ziektu: H.Zate, Hmar Rûn.

'Țhadâng nuimawi ka chhuang thei êm che,

Han nui leh la, Thinlai a dam ngei ang!'

    tiin Biakkima chun a hla ziek 'Han Nui leh La', Zaithanmawia in a sakah a lo insam a, a hla a nalin a thu a țha a, a saktuin a thiem bawk si a, ngaithlak nghawk um naw tak a nih. A țhadâng chu a suong thei zie le a ta dinga a hlutzie hrilin,  A hmela innui hmêl mawi tak inlang hlak chu mawi a ti el chau ni lovin a lungril nâ khawm sukdam theitu a ni zie a hril.

Hi hla chau naw khawm, hla pakhat Pi Daduhi Khiangte (Lalrindiki Khiangte) in a sak a chun , 'Ka lam hawia i seih hian in, ka tan khuavel a par leh țhin!' a lo ti nâwk a.  A ta ding chun nuhmei el ni lovin a hlim a le lawmna a ni a. A tieng nghaa a hei innui seih ringawt khan a ta dinga khawvel a pâr hlakzie a hril hiel a nih. 

Nuhmei hi chu Pasal ta dingin khawvel thil siem laia mawi tak an ni hrim hrim a. A mawi naw ti naw an um awm kher nawh. Pasal chau naw khawmin nal an ti a, nuhmei le nuhmei khawm hi nal an lo inti vieu hlak! Mizoram a Comedian Search a naupang pakhatin,  'Pathienin pasal ditzawng taka nuhmei a siem hi chu a thaw fuk ngawt el!' a lo ti ang deuvin Pasal mawi le nal a ti zawng taka siemtuin Nuhmei, a kawppui ding a siem hi chu a thil thaw laiah a thawfuk tak a ni hiel awm ie!

Nunghak hmelțha deu hi chu papui khawmin an thlir nghawk bik naw a. Țha le mawi ti êm êmin an thlir a, an thlir nawn nâwk rawp hlak. An lêr lei a ni chuong nawh, Pasal ta dingin Nuhmei tluka mawi khawvelah a um tlat nawh annawm! Mi huona pâr khawm mawi le nal tiin ei thlira ei huona um dingin ei dit tina ni kher lova!

Nuhmei hi chu ditumna tinrenga thuom a ni ang hrimin, pasal ta ding hin chu lawmum le ditum a'nchang a, a hlu ngawi ngawi hlak! A laka luongliem dinga a dit ang bawkin , ama laka khawm a luongliem hlak a. A beiseina le hlimna intluntu a ani hlak. 

 A tluka mawi a um naw a, an hlimpui hlak a. A hei innui seih ringawt khawm hin pasal ta dingin a mawl zuol a. Ditumna po po a nei vawng ta am ani ti dingin a lakah val an luongliem hlak. Nuhmei awm nem tia ngainep ni hlak sienkhawm, Pasal ropuina intluntu a ni angin, a nêka upa lem pasal khawm duot taka enkawl a, beiseina siempek a, beiseina hring inneitir theitu a ni nâwk tlat si.

Nêlum, zuomum si naw, Ngainatum, ngaia natna ni si lo. Inzaum, țium ni si lova a um thiem le a mawina sukvul tâwk chau inchei a thiem el khelah a hlim a nih ti hriet dinga a hei innui seih hin chu val lung a kuoi naw thei ngai nawh.  Amaah hin siemtu themthiem zie a'nlang a, Nuhmei var le țha chu pasal ta dinga khawvel mawina sukzuoltu a ni rawp hlak.
Aw nunghak, i mawina hin val lungril a hluo zova, i  mitmeng ringawt khawm a ta dingin hratna intluntu   ni a. I mittui hlak a hrâtna sukthâmraltu a ni a. I hei innui seih hin hlimna, lawmna pein i sukhrat hlak a, a ta dinga a lawm kimna le beiseina siempektu i ni mieu leiin, 'hei innui seih la, ka lawm kim a tih.' a la ti rawp hlak a. Tu am a nih ta dinga hlimna le lawmna ni rawp hlak dingin, ih, ret naw la, 'Innui Seih La!'

27 July 2017 | Guwahati